Nepal zin report

Dawrpui Vengthar Branch Ktp in, kum 2011 Project pakhat atan ‘Ramthar zin’a rel a.Kan hruaitu leh member ten chak tak a bawhzui in,Kan kohhran atanga Missionary chhuak,kum 10 chuang thawk tawh Pu P.Thansiama Pokhara,Nepal-a thawk mek leh tun hnai a Dawrpui Vengthar Pastor Bial a Pro Pastor a rawn awm,tuna Pastor lo ni ta Rev.R.Lalrinliana Bharatpur,Nepal-a thawk te chu tlawh tur in kan in buatsaih a,tih hlawhtlin a lo ni ta a ni.Mi 17 Nepal ah kan zin a,kan zinkawng leh kan hun hmandan thenkhat kan han tarlang a nge.

Aizawl atangin Guwahati ah..

Nov ni 26,2011 zing dar 8:10 ah ah kan Bialtu Pastor,Rev K.Lalhmuchhuaka’n tawngtai in min thlah zo a,Sumo ah kan lut a kan tlanchhuak ta,Bualpui ah tukthuan ei tum a kan han in buatsaih lai chuan phone a lo ri ral ral a, Kan Br Secretary Tv.Tete-a Bag Pu Dawnga te kawt ah a lo la in hung ngat a ni awm e! Vairengte ah chhun thingpui in thla leh in,Lailapur kan thleng thla a.Sumo chhung ah kan hlim thla viau a,Kawngchhia erawh duh angin a tlanchak theihloh,Khua a lo thim ta mai a,Meghalaya ram kan lut a Kawngsir ah zunram thiara kan din lawk laiin ek rap kan awm hman pek a,kan rimtui vaklo tan a,Ladrymbai-a chaw ei tum kha Sonapur ah kan ei hman ta hram a,Sonapur atang a kan chhuak chiah kha thenkhat in Shillong kan thleng tawh dawn emaw ti a,an chhungte lo phone tawk te pawh kan awm! Shillong leh Ladrymbai hi a lo in hnaih ta thut emaw dawn ni..! Shillong leh Jowai inkar ah kan han ding leh chu kan Asst leader a zam tan ta! Nepal thlen zawh a in ringlo tan! Mahse,Pathian hruaina in Guwahati chu Nov 27, zing dar 3:15 ah kan thleng a,Mision Compound ah kan in nghat a,Rev Lalhmingmawia'n lawmthusawi tawngtaina min neih sak a,kan intifai a,rei vaklo ah kan mu ta a Chhunlam ah thil buaipui ngai te buaipui in mi thenkhat kan chhuak a,tin,Pi Biakkungi(Biak in hnung) te makpa, Pu H.Tawna te chhung in Lunch min buatsaih sak a,Kan puar in kan tlai khawp mai.Hetih lai hian Tete-a Bag pawh U Chungnungi(OP Travels) te puihna zarah Guwahati a rawn thleng thla ve leh ta bawk a,Zan a ni a.Dar 7 ah Guwahati Pastor in tawngtaina in min thlah a,Auto Rickshaw 4/5 vel hmangin Train Station kan pan phei a,Zan Dar 9:30 ah Siliguri pan in kan chhuak ta a ni.

(1.Zing dar 3 vel ah Guwahati train station 2.Guwahati pastor ten minlo hmuak 3.Pu Tawna te in kawt)

Guwahati atangin New jalpaiguri ah..

Kan Rel chuang tur kan buai zia leh vaiho ninawm zia chu sawitel lo mai ang,Zan dar 11 vel ah Pu Tawna te in a kan ei bang kan chaw fun te rel ah kan thet a,kan eizawh chuan kan mu ta hlawm a,A tuk(Nov 28) zing dar 6 ah New Jalpaiguri(NJP) kan thleng a,NJP atang hian Sumo pahnih kan hire a,nepal ram khaw hmasa ber Kakarvita chu chawl lo in kan pan ta nal nal a,zing dar 8 a lo ni a,nepal ram kan lut ta! Border ah kan Missionary Pu P.Thansiama'n minlo hmuak a, sipai duty te check buai ngai miahlo in Pu Thansiama'n ruahmanna minlo siamsak vek bawk,Kakarvita Mision Compound ah kan in nghat a,Pastor Nghaklianmawia chuan Lawmthusawi tawngtaina min neih sak a,Pastor Nghak-a nupui hi Dawrpui Vengthar Bial zaipawl a hun rei tak tel tawh Janet-i kha a ni nghe nghe a ni.Kan chawl hahdam ta vang vang a.

(1.Zingkar ah Njp train station ah 2.Foreign ah kan awm ta..)

Kakarvita atangin Pokhara ah…

Chaw te kan eifel hnu ah Chhun dar 12 ah,Km 600 chuang Bus a chuang turin Kakarvita a tangin Chhun dar 12 ah Pokhara kan pan ta a ni.Bus ah hian Bus enkawltu mi pali leh Pu P.Thansiama leh a thawhna hmun a ringthar leh thawktu te nula 3/4 vel an rawn tel ve bawk a.Kan tlanchak khawp mai,kawng lakah a khat tawk in zunram thiar in kan ding zeuh zeuh a,zuk leh hmuam a tih theih ta bawk si loh,thenkhat in hreawm kan tuar tan,rei tak kan tlan hnu chuan Bus hnunglam a thu kan nepali nula te leh kan hruaitu thenkhat te chu an thawm a rawn na telh telh,English,Hindi,Nepali tawng inpawlh leh zaizir in an inkawm chho tan ta,an in inkawmngeih ta phian a, Kan tlan rei ngar ngar bawk a, kan hruaitu thenkhat te kawng laka Bus ti ding hreh a,mineral water leh coke bur ruak te pawh zunbur a tan an hmang thiam viau te kan awm lai in hmang ve theilo a hmawr zai zau deuh ngai te pawh kan awm a,a hlimawm takzet a ni.Phai phei deuh vek a ni na chungin Pokhara kan thleng theilo lutuk leh kan tlanrei lutuk kha a mangan thlak duh khawp mai.Vawi tamtak kan mutthluk hnu ah (Nov 29) zing dar 3:30-ah Pokhara chu kan thleng ta,Boruak a dang ta hret a, Khua a lo vawt ta deuh a,kan in nghahfel hnu chuan a tuk inkhawm a awm tih hria in kan mu ta vat hlawm a.

Pokhara chamchhung..

Oct Ni 29(Inrinni) hi Pokhara ah chuan kohhran inkhawm ni a ni a,Biak In riahnan kan hman a vangin Pu Thansiama te kawt ah inkhawmna remchang tak an lo siam a,dar 11 ah inkhawm kan tan a,kan Pual in welcome banner nalh tak mai an lo tar a,a phurawm duh khawp mai.Pokhara Thalai leh naupang ten lam an entir a,keini lam kan zai a,Pathian fakna hla pahnih kan sa a,tin,kan kaihhruaina in kan zavai a pathian faka lam na hun te kan hmang a,nuam an ti ve hle in kan hria.Kan Branch Asst Leader Tv.Lalfakawma’n kan kal chhan a sawi a,introduction pe bawk a,kan branch secretary Tv B.Lalrinawma’n thuchah tawi a sawi bawk a,Pu P.Thansiama’n tawng min lehsak a ni.Programme hlimawm tak kan hmang a,Inkhawm banah Pu P.Thansiama fanu te zawk Pinky-i birthday lawmna kan nei zui a,ruai te kan theh chhunzawm bawk a ni.

A tuk Oct ni 30 zingkar ah Majua-a ringthar hmeithai pakhat Monu Pun-i huanpal leh kawngte, siam tha in,a huan ah lei kan va let bawk a,kan beisei loh lam ah work camp hlawk takin kan hmang a ni. Ani hi an thenawmte Hindu deuh vek annih avangin, an hmusit hle thin a ni awm e,Pi Monu-i pui tur a kan va kal chu a lo lawm hle mai a.a hnuk te pawh a ulh lek lek a ni.Amah kan va tanpui a,kan support tlat a ni tih kan va lantir a, a lo tha khawp mai.Chhun lamah Sighseeing kan nei a,chumi zawh ah ringthar fanu pakhat birthday lawm a ni bawk a,he thil pawh hi sawi teuh tur a awm a tarlan kim vek sen a ni si lo.Hun nei tamlo chung a ringthar te leh kan ringtu pui te in a kan va kal hram thin kha rah tha tak a chhuah kan ring tlat a ni.

(1.Pi Monu-i te in ah hna kan thawk 2.Pratima Birthday kan lawm)

1.Bharatpur pan dawn ni..2.Pokhara ah kan kohhran inkhawm ah kan tel ve..)

Chhun lam a Sightseeing kan neih dan tlem azawng tarlang ila, khualzin ten an tlawh luih luih thin hmun li(4) vel kan tlawh hman a, hun awm tam sela tlawh tur tamtak a la awm a,nikhat ah chuan kan kal vek hman ta lo a ni.Kan damchhung a kan hmuh leh kan kal kan rin phak ngailohna hmun ah kan kal nual mai.Tisa leh thlarau ah hlawkna kan tel ve tlat.Khatiang hmun nuam leh khualzin ramdang atang a khualzin tamtak ten an tlawh thin ah te Pathian in min hruai thleng kha kan vannei kan inti a, hmun dangdai leh mawi tak tak kan hmuh khan Pathian ropui zia kan hmuh fiah belh nasa em em a ni.Phewa Lake ah kan kal a,Dil lai taka Thliarkar chu lawnglengin kan va tlawh bawk.Lawng chuan hlau pawl te pawh kan awm a,kan hlim hle . He dil hi 4.919 kms a thui, 1.881kms a zau, 19.90 meter a thuk ani. Hei bak Devis Fall te, South Asia Puk sei ber an tih Gupteshwor Mahadev Cave te leh International Mountain Museum te kan tlawh bawk.Tin Pokhara khua hual vel tu Mt.Anapurna leh Himalyan tlang Vur in a bawh vo mai te khan Pokhara cham a ti nuam hle mai a,Pathian min hruaina ah lawmthu kan sawi thin a ni.

Sightseeing thlalak te...

Pokhara atangin Bharatpur ah…

Oct 31,chhun dar 12 ah Pokhara atangin Rev.R.Lalrinliana(Rina) thawhna khua Bharatpur kan pan leh ta a,tlai dar 3:30 ah Bharatpur kan thleng a,Rina hian khawdai ah minlo hmuak a,Pastor quarter lam kan phei a,Rina nupui Nuteii leh an fanu Hannah-i te hmel kan hmu a,kan hlimtlang khawp mai.Rina te chhung leh Bharatpur a thawktu dang mizo leh hnamdang awm ten minlo lawm thiam kher mai.Kan in nghah fel hnu chuan Pastor quarter atang a hla vaklo Bharatpur Biak In- ah hnathawh tur awm te leh kan hna a tan a mamawh te lam khawm turin mi thenkhat kan thawkchhuak lehnghal a ni.Tin,Bharatpur Biak In hi Zarkawt Kohhran in an sak a ni bawk a ni.

Bharatpur cham chhung….

Zan lamah programme siamlo in kan awm hahdam a,a tuk Oct ni 1,zingkar hmatak ah tho in Biak in bula Building thar pakhat ah Guest room tur leh Field Secretary office tur Electric wiring,Rawng hnawih leh a tul tul ti turin kan phei leh nghal a, kan bur ta ngar ngar a,chhun dar 12 ah hna kan zo fel a,chawhnu lamah Rina leh Missionary Zote-i te ho in Bharatpur bazar lam ah kan tei chhuak ta a ni.Khawthim hnu ah kan haw khawm leh ta hlawm a, a tuk hi Nepal Field Committee neih ni a lo ni a,Bharatpur Pastor Quarter chu Committee-na tur hmun a lo ni nghe nghe a,Rina te chhungpawh in mikhual an thleng tan ta a,mikhual lo thleng hmasa te nen chuan Rina te Sitting Room-ah chuan zan lamah Pathian faka zaiho na leh sharing hun te kan hmangin zan dar 11 vel thleng hun kan hmang a ni.

(1.Bharatpur khua a lui lian ber Narayani kam ah 2.Rina te in chhung..)

A tuk Oct ni 2,hi kan haw ni tur a ni a,zing dar 9 ah bus pakhat min rawn lam tur a tih a ni a.chumi hma zingkar ah Ganeshthan (Pastor quarter atang a km 4 vel) ah,ke in ringthar ho kan va tlawh kual a,rilru a khawih duh kher mai.Mirethei tak tak,in leh lo tha pawh neilo awmkhawmna a lo ni a,Hindu ho kar ah Kristian in pakhat lek lek hi a lo awm leh zeuh zel a lo ni a,thenkhat phei chu an khawsak a harsat sa tawh tehreng nen kristian an nih a vanga tih duhdahna leh hmusit tuar in hreawm tak in an lo awm a.Hun kan nei tlem si,an kawngka ah kan dak hman tawk hi a ni deuh ber.In pakhat ah mi pakhat zel in tawngtaina hun kan hmang a,In dang ah kal leh zel a lo ngai a,tlema khawsak harsa leh taksa bawrhsawmna avang a hnathawk tha theilo te awmna in ah kan pawisa nawi kawl ang te kan vawm khawm leh zauh thin bawk a,Kan thil hmuh leh hriat te hian rilru a khawih duh viau mai! Kan luhna In tinah,kan tlawh te chhung nen thlalak ho na kan nei zel bawk a,In pakhat phei chu kan kohhran,Dawrpui Vengthar Kohhran Hmeichhia leh Dinthar kohhran hmeichhia ten pawisa thawn in,Chenna in an lo zuk sak kha a lo nghe nghe a,An kawngka biangah kristian annih zahpui hauh lovin Kraws lem ziah an duh a,kan ziahsak nghe nghe a ni.

Ringtu kan tlawh zawng zawng te hi an lawm hle a ni tih an hmel leh an chet zia ah pawh a hriattheih thin a,Keini lam pawh kan lawm ve viau bawk.In pakhat ah phei chuan thingpui ruai minlo buatsaih sak a,thingpui kan in hma in Puri min rawn sem kual den den a,Puri kan ei zawh chuan Sana kan han en a,kan haw a lo hun der tawh mai,Kan haw na tur Bus in minlo nghak reng tawh bawk nen kal nghal mai a lo ngai ta si ! Rina te chhung in zing chaw min buatsaih sak kan la ei bawk silo a,thingpui pawh kan insak ta hman ta lo a ni.A nuamlo kher mai! Hmanhmawh lutuk in kan haw ta a,ke a kal kan ni a,In kan thleng chuan Field Committee hmang tur in mikhual an lo thleng kim tan bawk a,a thlengtu Pastor Rina te chhung pawh an buai ta vut vut hle mai.Chaw ei tur in kan ei a,thenkhat in mikhual an lo lawm a,kan Bus Driver te lahin minlo nghakrei tawh bawk si,kan ri ta nuaih nuaih a,chhuak turin kan inpeih fel ta.Nepal field secretary leh Nepal missionary pastor ho leh Field Committee tura lo kal te nen a awm zawng zawng in thlalak ho na kan nei a,zing dar 10:30 ah chuan Bus ah kan lawn a kan in vai liam ta a ni.

(1.Dawrpui Vengthar leh Dinthar Kohhran Hmeichhia te sak In, 2&3. Ganesthan ringthar te kan tlawh,4.Bharatpur atanga kakarvita haw dawn ni...)

Bharatpur atang in Kakarvita kan thleng phei leh ta

Zin kawng thui tak mai kha kan zawh let leh ta a,kawng ah pawh kan tluang khawp mai,kan bus driver pawh bharatpur a cheng,hindu sakhaw bia,mahse,kristian ah siam an tum mek lai a lo ni a,zuk leh hmuam insum a ngaizual khawp mai lehnghal a,kawng lakah leh ramhnuai ah kan chawlh hlek in keini lam mei zu chi ho kha a ruk in an han ti leh pet pet thin a,kawng chanve kan kal meuh chuan kan Bus driver te nen Cigarette an in theh ta vel a,(Darkar 10 vel kha chu han insum phei ta hlawm se ka lo ti rilru ve mai mai a)Tluang tak in zan dar 9:30 ve ah chau em em lo in kan thleng phei a,Kakarvita ah thawktu ten kan chaw eitur nen minlo hmuak leh thlap mai,Pastor Nghak-a pawh bharatpur lamah khan a lo thleng phei daih tawh a,a awmlo chung khan thawktu ten ruahmanna fel tak nen minlo hmuak a,an fakawm khawp mai.Missionary Tv.Apuia'n Lawmthusawi tawngtaina a neih zawhah chaw kan ei a,kan inbual fai hnu chuan mut zai kan rel ta a ni.A tuk Nov ni 3 chhun lamah Dulabari ah kan bazar a,chawhnu dar 2 vel ah Kakarvita Mission Compound bawk kan let phei leh a,haw tur in kan in peih fel leh ta a.

Kakarvita atangin Zoram lam panin kan lo chhuak a..

Nov 3,tlai dar 3:30 ah Kakarvita atangin Sumo pahnih in Nepal ram chhuahsan in New Jalpaiguri(Njp) kan pan leh ta a,Border kan thleng a,kan Driver in 'Christian Biak in a kal an nih hi' a ti zeuh a,check buai ngai lo in nepal kan rawn chhuahsan leh thei mai kha a mak a ni! Dar 4:30 ah Njp train station kan thleng a,India ramah kan awm leh ta vang mai.Tlai dar 6:30 ah train in Guwahati kan pan ta a ni.Kan kal lam ang in kan thukhawm thei ta lo a,vaiho karah kan inzep phei ta thliah thliah mai a ni.Kan khawhar viau dawn emaw kan tih lai in dar 12 a rik chuan engtin emaw awmkhawm pawl chu kan awm tho ! Kha mi zan Rel kan chuang kan hlimzia kha aw...!! Vaiho pawn min nek ngam vaklo. Tv.Sempui-avang kan tilo theilo a ni.Nuam tak a ni.Nov ni 4 zing dar 3:45 ah Guwahati train station kan thleng leh a,darkar khat dawn kan thrut hnu chuan Sumo in min rawn lam a, zing Dar 4:45 ah Shillong panin kan chhuak leh a,dar 8:30 ah Shillong kan thleng a,Synod House Laimu/Laitumkhrah-ah in nghatin chaw te eiin kan chawl hahdam leh hret a ni. Nov ni 4 chawhma dar 11 vel ah Shillong- a kan kohhran Pastor, Rev Rualzakhuma chuan tawngtai a min thlahin zoram lam panin kan lo chhuak leh a,Jowai traffic jam ah kan muang hret tihloh chu tluang tak a rawn tlanin,ladrymbai ah thingpui in chawlh kan nei a,zan dar 11:30 ah Vairengte ah chaw kan ei a,Nov ni 5 zing dar 7 ah Aizawl kan lo thleng leh ta a ni.

Nepal kan cham chhung te,kan zinkawng leh kan innghahna hmun hrang hrang ah hian chanchin hlimawm leh lungchhiat thlak te,kan hmasawnna tur te thil tamtak kan tawng a,sawi kim vek sen a ni lo.kan chamchhung khan thalai mi 20 dawn in inkhawmna kan neihpui leh ringthar te kan han tlawhkual kha tam/thahnem min ti em em a,min thlamuanpui ve thin khawp mai.Ktp General Conference-a lokal ve atan kan duh thin khawp mai.Pokhara a an kohhran secretary chu Saraswati a ni a.Amah hi nula a ni a, Mizoram lokal hi a tumruh hle mai bawk a,an khua tak chu Bharatpur ni in, in leh lo nghet tak an nei a,a chhungte kalsan in rawngbawl turin Pokhara hian a awm a ni.Ktp Conference hmang tura chahchhuah ve a tan kan it khawp mai.

Pokhara leh Bharatpur a hun kan hman chhung hian kan hun a tlem viau e tilo chuan Bazar lama len chhuahna hun kan nei thei zel a,a dawr a kan luh chang leh kan han vahvel hian Foreigner ah min ngai vaklo a,mizo tawng a kan han inbe ta chiah hi mak an ti thin khawp mai. ‘Khawi atanga lokal nge in nih?’ tih zawhna kan dawng hnem hle a,India mi kan nih thu kan sawi hian mak an ti thin khawp mai.Tin,Nepal-a Kristian te hian kawng lak a an intawh te,mi in a an len te leh an ringtu pui an hmuh a piang hian in chibai na tawngkam an nei a ‘Jai Masih’ (Isua hmingin,Chibai) an ti hmasa zel thin a ni.

Kan sawi vek senglo a ni ber e,a tawp ber ah chuan,kan zin kawng leh kan haw kawng ah te,motor rui buai leh taksa hrisel lohna a vanga harsatna tawk pakhatmah kan awmlo a,kawng lakah motor tih din ngai in harsatna kan tawklo a,Border ah check ngei ngei tur kan nih lai in kan ID tak ngial pawh phawrh ngailo a kan awm te kha Pathian hruaina a va ni chiang tak em.Pathian hnen ah lawmthu kan sawi a,min tawngtai sak tute zawng zawng chung ah lawmthu kan sawi a ni.

Share