Bill Gaither

Grammy Award 5 leh Gospel Music Association (Dove) Awards 32 bakah America rama hla phuahtu leh tichhuaktu inzawmkhawm pawlin kum zabi 20-na chhunga hla phuahthiam bera an thlan leh Mizoten a hla phuah tamtak kan lo tuipui leh kan ngaihsan em em chanchin hi i hre tawh ngai em?

Bill Gaither hi William J Gaither tih hming pu in Indiana State(USA)-a khaw te takte Alexandria ah loneitu nu leh pa inkarah kum 1936 khan a lo piang a. A naupan lai atangin rimawi lamin a hip hle thin a, a naupan laia zaithiam the Statesmen, the Dixie Four leh the Harmoneers Quartet hla a ngaihthlak thin chuan a rilru ah music lama kal duhna lian tak a lo siamsak tawh a ni. A duhna chu a taka lo changin kum sawm chuan kal tawh daihah khan Gospel Music a miropui bikte chawimawina Hall Of Fame ah lawmluh a lo ni tawh a ni.

A nupui Gloria Gaither leh Billy Graham nen...

Hla phuah tura Pathian siam hian hla phuahin bul a tan bik mai lova, hlaphuah lama a kal tak tak hma hian High School-ah English zirtirtu niin basketball coach a lo ni tawh a. Nimahsela naupangte hnena sentence siam dan leh rebound lak dan ngawt zirtir atan Pathianin a lo ruat hauh lo. Zirtirtu hna a thawh lai atangin hla a phuah reng a, kum 1963-a a hla phuah "He touched me" tih chu Elvis Presley-an 1969 ah a albumah a telh ve ta a, heta tang hian khawvelin Bill Gaither a lo hmelhriat tan a, a theihnghilh leh tawh ngai lovang. Kum 1962 ah a zirtirtu pui Gloria Sickal nen inneiin ani nen hian fa pathum-mipa pakhat leh hmeichhia pahnih an nei a ni. Tin, hla 600 chuang an phuah dun tawh a, U2 leh Aerosmith album belhkhawm aia tam siam tawhin The Beatles aiin Grammy Awards an la hnem tawh zawk a ni. Hei vang hi ani mahna Donna Hilley, CEO of Sony Music Publishing-in "Gaither te hi Christian Music The Beatles an ni " a lo tih hial ni.

Bill Gaither Trio,Trio in Jerusalem,Gary Mc spadden leh an nupa

Khawvel hmaa Amah tantute chu Pathianin khawvel hmaah a chawimawi ve thung a. Gloria nena an inneih hnu lawk hian a unaupa Danny-a nen an nupain The Bill Gaither Trio an din a, 1970 a an siam Alleluia: A Praise Gathering for Believers tih chu Gospel Album zinga Gold status (copy nuai 5 hralh chin) nei hmasa ber a lo ni ta hial a ni. Kum engemawchen zirtirtu hna thawk chunga hla a phuah a, a record hnuin kum 1967 ah a hun puma music luhchilh turin a hna pakhat chu a kalsan ta a. Group lar tak Gaither Vocal Band chu kum 1980 tirlamah a din a. He Group indin dan hi a ropui hran lo khawp mai, Gaither Trio-in concert an neih tuma an chawlhlawk laiin zaia lo puitute nen an din a ni. He Group-a lo tel tawh Gary McSpadden, Michael English, Steve Green, Larnelle Harris, Mark Lowry leh Jonathan Pierce te chuan anmahniin career hlawhtling tak an lo nei tawh a ni. Grammy Award leh Dove Awards a lo dawn tawh te chu:

Grammys:

Best Southern, Country, or Bluegrass Gospel Album 1999,2001

Best Southern Gospel Album 1991

Best Inspirational Performance 1973,1975

Dove:

Songwriter of the year1969,1970,1972,1973,1974,1975,1976,1977,1986 (Gloria)

Song of the year 1974,1985,1988,1990

Southern Gospel Recorded Song of The Year 1994,1995,1999,2001,2002

Southern Gospel Album of The Year 1987,1991,1992,1993,1994,1999 to 2002

Inspirational Album of The Year 1976,1978

Long form Music Video of the Year 2001

Mixed Group of the Year 1980

Praise and Worship Album of the Year 1986

Heng bakah hian a video engemawzat Billboard Top 10 ah lang tawhin No 1 nihna hial an hauh tawh a, copy maktaduai engemawzat an hralh tawh a ni. Entrepreneur Magazine in entrepreneur tha 75 a thlan zingah a lo tel tawh bawk. Tin, kum 2000 khan American Society of Composers and Performers (ASCAP) chuan a nupui Gloria nen Songwriters of the Century ah a lo thlang tawh bawk a ni.

Dove awards nen, A naupan lai...

Heti khawpa chawimawina a dawng chung hian Bill Gaither hi a chapo ngai lova, artist tharte a puih nasat zia leh an thlarau nun a tanpui nasatzia hi a music thiamzia aiin a bula awmte sawi tam zawk a ni reng a. Alexandria khuaa an thenawm paho nena Pathian Thu sawiho nuam a la ti em em reng bawk a ni. A nihna anga lang mi a ni a, stage a a awmdan leh hmun danga a awmdanah danglamna a awm lo. A nihna ang anga Pathian fak duh mi a ni a, mahni talent hmanga Isua Krista chawimawi pawimawhna sawi uartu a ni. Heti hian a sawi: "Ka upa tawlh tawlh a thil ka hre tlem tawlh tawlh. Nimahsela ka hriat chhun erawh ka chiang hle. Chung zingah chuan Sunday School ka kal laia Isua Krista lema "Lo kal rawh" tih inziak khan mite a ko tih ka hria a, he thu hi mite hnenah tawmpuia puanchhuah ka duh a ni. Style chu an awm a an bo leh mai a, music bak hi a awm tur ani. Hei leh chen kan awm theihna chhan nia ka hriat chu miten Isua Krista kan hmangaihna an hmuh vang niin ka hria". Bill Gaither hi politics diklo lakah a inthiarfihlim hle a, miin heng function-a an sawm pawhin "Lal Isua bak promote kan tan a rem lo" a ti thin.

GVB album thar ber Cover(2011 August - a tihchhuah),Tun a GVB member te..(Wes Hampton,Bill Gaither,David phelps,Michael English,Mark Lowry)

Share

Gaither Homecoming video lo chhuah dan:

Gaither Vocal Band leh Gaither Homecoming lo awm hian Mizo te Gospel Music-ah hian hmasawnna tam tak min pe niin a hriat theih a. Male Voice-a zai thin Gaither Vocal Band te hi Ktp-ah hian hre lo kan awm lo hial ang. An zaithiam zia sawi ngai lo in kan hria, an hla thenkhat te pawh mizo tawnga letlingin, Biak In inkhawmah leh Ktp fellowship-ah kan sain kan ngaithla thin a, tin, zaipawl te pawhin kan zir thin kha..... Gaither Vocal Band member ni ve lo Homecoming video-a lo lang leh lo zai ve thin te hi zaithiam lar tak tak vek leh music khawvelah Professional deuh vek an ni tih hi hriat tel a tha awm e. Mi mal ang pawhin music khawvelah sulhnu leh an hlawhtlinna chanchin tam tak sawi tur an nei theuh bawk a ni. Gaither Homecoming artist te hi, kan hmuh thin angin an hmel hmuh a nuam a, Pathian an fak a ni tih hi a hriat em em a ni. Homecoming-ah hian music arrangement pawh a tha a ni tih kan hria a, an hla phuah leh sak tam tak hi mizo ten kan lo tuipui a, Pathian fakna hla tha tak tak kan lo neih ve phah ta nual mai. Gaither Homecoming lo chhuah dan hi han sawi dawn teh ang.

Kum 1991 khan Bill Gaither (Gvb-a bass part sa tu kha) chuan Music khawvela a hun tawplam a hmang tan niin a hria a, a tawpna atan tiin Gaither Vocal Band nen album siam turin a inbuatsaih tan a. Hetah hian zaithiam a lo ngaihsan em em thinte nena an hla thiamtlan sa pakhat tal sakho a beisei a ni. Hovie Lister-a han be hmasa ber a, chutah George Younce, Glen Payne, The Happy Goodman Family, Jake Hess, the Gatlin Brother, the Speers leh midang engemawzat a sawmten an kal theih tur thua an chhan avangin a lawm hle nghe nghe a.

Recording ni a lo thleng a, artist-te chu hun rei tak inhmu tawh lote an nih hlawm avangin an inhmukhawm chu an lawmin an hlim tlang hle a. Zaithiamte hi chuai lam an nih hlawm avangin an tunhma hun sawi tur an ngah tlang hle a. Hemi ni hian nidanga a la tih ngai loh angin Gaither hian hla pakhat chauh record tur hian nilengin Master’s Touch studio chu a lo book tlat mai a, hei hi Pathian hnathawh lan tanna a lo ni reng mai. Recording room-ah an han lut a, Bill Gaither a tawngtai a. Hetah hian camera pakhat an nei a, Vocal Band-in music video an siam huna telh tur tlem azawng lak an tum a ni. Chutah JB Coats hlaphuah "Where could I go but to the Lord?" tih chu an han sa tan ta a.

Professional thiau an ni a, recording neih laiin thlarau pawlna chan pawha awmdan tawk thiam a pawimawhzia hre vek an ni. Nimahsela minute sawm a ral meuh chuan recording session naran a ni dawn lo tih a lo lang a. Pathian Thlarau an hnenah a awm a ni!

Hemi ni hian Jake Hess chu mitthi vuinaah zai a ngaih avangin a rawn tlai a, a rawn thlena an hla record a han ngaihthlak chuan thil danglam a awm tih a hre nghal mai a, Kristian pachal, kum sawmruk chuang zet chuan "Hetianga Pathian Thlarau chen nasatna hi ka la hre ngai lo" a ti hial a ni.

" A mawi lutuka kan sa tha leh ang!"

Hemi nileng hian hla dangte sain an zaikhawm a, he an zaikhawm camera-a an lo lak chu kum 1992 khan "Nashville Homecoming" tiin a lo chhuak ta a ni.

Share

Lehkha Pawimawh

Dawrpui Kohhran atang a Dawrpui Vengthar Kohhran a indan hlim a lehkha ziak pakhat, Kum 1958 a mi a ni awm e. Click la,chhiar rawh le...

Share

Biak In Pahnihna

Mi an lo pun zel avangin Biak In chu a tawt tan ve leh ta mai a.Kohhran Committee rawt angin May ni 28,1961-ah a sak dan tur Kohhran vantlang inkhawmin an rel a;a bathlar zauh an rel a.chumi hnuah chuan Kohhran Committee duh angin an sawi nawn leh a.

Biak In ding lai sakhnan a,a lian zawk a sak chu an rel thlu thei ta a ni.Thawhlawm pawh khawn nghal a ni a.Thalai Pawlin Rs 860/- an ngah a.Kohhran Hmeichhiain Rs 265/- an tlin bawk a.Kohhran mipui thawh khawm nen,Biak In a dung Ft 55,a vang Ft 34-a zau chu an sa tan thei ta a.A Bangbul (Scirting) atan Lawirawhchan (Brick) an rem a;a bang Hratvunchar (Tile),a ban ngiau puichang,a chung Rangva chhah chi hman a ni.Theihtawp tak meuhvin tan an la a,April ni 5,1965-ah Inkhawm nan an hmang tan leh thei ta a ni.

Biak In sak hmang hi-a dung,a vang leh a san zawng,a chung chhawngah a sir tluan tawnin darthlalang bel vek leh ventilation te,kawt lamah varandah inte tlema chei leh,dithlifarfem thing zai kaka bel tluanchhuah inchawih tak mai bakah kawngkapui pahnih inkarah lian tawk takin darthlalang rawng hrang hrang a belkhawm hlam bial zet tura zau awm chuan mit a la in a tih mawi phah hle a ; Biak In sathar tur te hian an rawn en ve fo thin a ni.He Biak In ah hian zai a nuam em em mai a,Aw,a thangkhawk ve lova; zaipawl hla rem hi a mawi zual bik emaw tih mai tur a ni.

pic1(1980 leh 1990 chhova Ktp hruaitu te.) Pic2 (Biakin 2-na kawt ah kohhran Hmeichhia te)



Biak In Vestry : Biak In hmar lam hi thenawm ram chin deuh maiah sak a nih avangin hmun awl a awm lova.Thlanglamah te tak tein thawhlawm thawhlawm chhiarna tur Inte uluk taka siam a ni a;Kum sawm dawn lai hnuah chuan Sakrament buatsaihna hmun pawh awmlo chu Vestry pangngai ve deuh sak rel a ni a.Biak In char lam ah Pu K.Remsiama ram bawk chu dil a ni a,ani chuan tlawmngai takin Kohhran mamawh zat chu a lo leitir leh thei ta mai a,an lawm em em a ni.Upa Sangkhuma(Thing mistiri) Lungdai khua chu ruaiin,Biak In vang lam tia in a chung chhip atangin chhunkuna uluk takin Biak In timawi zawk mah a sak a ni ta a.Kum 1974-ah luah theih a sak zawh a ni.

Biak In Hungna: Biak In chhak lamah hungna siam a ni a.Hei hi ramri laiah pawh ni chuang lovin a rem lai ah lunglum dan nan leh tuihawk hruai ngilna atan siam a ni a.Kawt lamah Kum 1971 ah Rs 368/- chawiin Gate thir/-a siam a ni a.Thlang lamah pawh chhuah thlakna uluk tak step siam in Gate Rs 475/-seng in siam leh a ni a,Biak In hungna pal leirawhchan (Brick)a pin te nen May 15,1980 ah zawh a ni hlawm a,Biak In ramri hi Sawrkarin phalna(pass)lehkha (order No 65 of 1976,memo No.DCL/GW-10/76/3433-8 of 14.6.1976)siam thlap a ni.

Biak In-a Electric Lakluh : Pathian Biak inkhawmnaah Petromax zan ah chhit thin a ni a.Aizawl khawpuiah sawrkarin electric a lak luh veleh Dawrpui Vengthar Kohhran chuan mahni ina lakluh ngaihtuah hmasa lovin Kohhran Committtee remruatnain Biak Ina lak luh dan ngaihtuah a ni a.Pu Lalkhawhluna leh a thenawm pa Pu Lalchhunga SDO PWD-te chu Electric Department Office-ah hotute bia in an leng a.Pathian Biak In tan anih avangin remchang lo siam theih an tum thu an lo hrilh ta a.An lawm hle mai a.Electric lakluhna tur sum tuak nan lehkha ip siamin kohhran chhungkaw in tinah an sem ta a,Kohhran hovin an thawh theih angte Ip chhung ah khungin inkhawm pahin Biak In ah an keng khawm a ni. An thawhlawm Ip te chu November ni 7,1971 ah an hawng a,A vaiin Rs 408/-a ni.Kohhran Tualchhung sum atanga tihbelhin Electric hrui zamna man leh thil tul dang atan Rs 536/-hman a ni a,Electric line Connection atan Sawrkar-a dah luh Rs 345/- niin, Senso zawng zawng Rs 881/- a ni .December Ni 7,1971 ah Biak In ah Electric eng chhit tan a ni a. Aizawl tlak lamah Electric eng chhi hmasa ber niawmin an inhre bawk a ni.

Biak In 2-na

Share

Biak In Pakhatna

Kan Biak In hmun hi Pu K. Remsiama leh Pu Ramliana(Bawrhsap Office clark i/c Transport) te chuan ‘Biak In hmun atan a remchang mai awm mang e’ti in, Kum 1955 khan Pu Satinkhenga ‘L’ leh a thian pahnih te chu an samfai tir a,A tirah chuan Taitan(Kangthai),Hel leh Thakpui hmun,Sih awmna anga hmun hnawng reng mai a ni.

Chutia an han sam fai takah chuan,Pu Khawpuia,Pu Lamthanga te leh midang te chuan an ngaihsak ta hlawm a.Thenfai leh laih zawl hnatlang an nei zui a,Pu Ramliana chuan an Office a mi (Petromax) khawnvar a rawn hawh a;zan ah te an thawk zui a,thla en zan te pawhin an bei a,August ni 1,1955 ah chuan Pu Lamthanga’n a vawk a thawh a,nileng hnatlang an nei a,an thawk nasa em em a ni.A ram chu a zim deuh avangin Pu Remsiama chuan ama ram a sahthlak tak bawk avangin an phur zual a,Kum a han tawp meuh chuan an lai zo vet a mai a ni.

Kum 1956 ah Dawrpui Kohhran atangin Dawrpui Vengthar Kohhran a indang a,Kohhran hruaitu tur te a ruatsak nghal a,chung an mi ruat te chuan,Kohhran indanna sum thehchhuah tur leh Biak In sak phalsak turin Dawrpui Kohhran ah an thlen a ni.Hruaitu tur a ruatsak te chuan Biak In sakna tur thawhlawm te an khawnzui a,Thawhlawm lut hmasa ber chu Pu Rongura te nupa in Rs 50/- an thawh a,Midang thawh nen avaiin Rs 1,402,.13/-(Rs Sangkhat zali pahnih leh anna sawmpathum) a ni a,Hei hian Biak in dung feet 31,a vang feet 20 a lian an sa thei tan ta a ni.ungrual takin tha leh sum thawh zui zelin a chung khuh theihin an peih ta a.Thawhlawm a awmthei ta silo,harsatna an tawkin an mangang ta hle mai a,Mahse,Pu Khawpuia’n tlawmngai neitu chan changin Biak In chung chu Rs 1200/- chawiin a khuh ta a,an sak tan kum vek ah luah theihin an peih ta a ni.

Thawh tur la tam mahse, an hah tawh avangin kum khat(1957) chhung an chawl a,Kum 1958 january leh February chhung, in tinah Biak In sakna thawhlawm an khawn a,Thla thar chawlhni hmasa ber zan apiangin Biak In sakna thawhlawm khawn thin a ni bawk a,Thla hnih a lo liam chuan Rs 171.80/- an hmu a ,an lawm hle a ni.An thawhlawm tlingkhawm chuan Biak In chhung leh pawn lam la zawh felloh te an thawm tha a,Khawnvar khaina te,khuang dahna tur te,Lehkha tarna te,Pulpit kharna te, an siam a,Laltin an lei bawk a, Kum 1960 a lo nih meuh chuan an sa zo ta a,hlim takin an luah thei ta a ni.

(pic1)-Biak In Pakhatna-a Innei hmasa te, Inneih inkhawm thlalak,(Pic2) Biak In a Innei hmasa ber te

Share

KRISTIAN RIMAWI LAM MI ROPUI THENKHAT TE

1. Johan Sebastian bach-a tluka Musician leh Composer ropui an awm tawh ngai lo mai thei, tiin an sawi thin. Bach-a chuan, “Isua Krista chu ka engkima ka engkim a ni. ka rimawi phuah zawng zawngte hi a tan a ni,” a ti a. A Music phuah zawng zawngte chu Pathian lam hawi, Bible-a innghat vek a ni a. A music phuahte chu khawvelah a tluk a awm leh tawh ngai lo ang an ti hial thin a ni.

2. Beethoven-a chu Mitdel, bengngawng a ni a. Mi piangthar, ringtu ropui tak a ni. A Symphony phuahte phei chu khawvela ropui ber an ti thin. Mitdel, bengngawngin khawvela Music ropui ber ber a han phuah tlat hi a mak hle. John Keats-a chuan, “ Rimawi benga ri kan hriatte hi a ropui hle a, a mawi em em a. Rimawi benga ri kan hriat theihloh te hi a la mawi leh zual zawk a ni”tiin a sawi. Beethoven-a , hmu thei lo, hre thei bawk si loin rimawi ropui ber ber a phuah thei tlat a ni. Pathian a ring tlat a. Pathianin a chawimawi ta a ni. A thusawi hnuhnung ber chu, “ Vanramah chuan ka hre ve tawh ang” tih a ni.




3. Ronan Keating-a hi mi piangthar tha tak a ni a. A naupan lai atangin kohhran zaipawlah, Dublin Presbyterian Church-ah a tel ve thin a. A tirah chuan a zai thiam lo lutuk a, zaipawla telah an duh lo a. A inzir vak a, Alto an sak tir thin. Sap ramah chuan kohhran zaipawlah hian naupangin Alto an sa thin a ni.

4. Khawvela Bass thum berte zinga mi George Younce-a kha lung tha lo a ni a, treatment la chungin kum 90 a tlin dawn thleng a la bass a ni. Dialysys treatment a la a, a tuk zanah a zai zui leh mai a. Keini chu zaipawl tel chu sawi loh, inkhawmnaa zai pawh kan ti tha peih lo. A hriselna chanchin an zawh pawhin, ‘Ka hriselna chungchang sawi hi ka ning, Isua fakin I zai ang” tiin Hovie Lister, cancer leh lung natna vei pawhin a chhang ve bawk a ni. Mi chuan an thih leh damna ai pawhin Pathian fak an ngai pawimawh zawk a ni.

KTP Half Yearly & Musical Meet dawn hnai a ni bawk a,Rilru ah hetiang lam hi a rawn lang tan tlat,Heng miropui taktak te hian Harsatna tamtak paltlanga Pathian anlo fak tlatna te hi thlirin,mahni in enfiah nan hmang thei ila a tha khawp ang.Tin,Kan PATHIAN hi fak a phu a,Chawimawi a phu a,Kan thatlai hun ngei hian kan aw leh Rimawi hmang hian nasa lehzual in Fak leh Chawimawi i tum zel ang u.

Share