Showing posts with label Pathian Thu. Show all posts
Showing posts with label Pathian Thu. Show all posts

RAM CHU LALPA TA A NI - Rev. C. Chawngliana

Bible : Sam 22 : 28

Kan rama chanchin tha a lo luh atangin kum za chuang a ni ta a. Thil ropui tak min tihsak a, min chawisangtu kan Pathian chu chu fakin awm rawh se. Hnam tin tan Pathianin an awmna tur ramri a siamsak theuh a ni tih kan Pathian thu-ah kan hmu a. Mizote tan pawh Mizoram hi kan chenna turin min ruatsak a ni tih kan pawm thei em aw? I han ngaihtuah teh ang u. Mi tam tak chuan phai zawl zau pui pui, leilet tha tak takte an han hmuh hian Pathianin ram tha bik leh duhawm bik a pe niin an hre thin a. Keini tlang ram chhengchhe taka kan awm hi an hrethiam thin lo a ni. Amaherawhchu kan Pathian hian tum neiin he ram hi min pe a ni tih kan ngaihtuah ngai em? Khati khawpa hnam mawl ni si kha a hnam atan min thlang a, khawvel tieng turin min din a duh a ni. Engtin nge Mizo hnam hi a him theih ang? tih Pathianin fel takin rem a ruat a, min ngaihsak a ni tih hi kan ngaihtuah a ngai a ni.

Kan unau, kan tlangmipui te phaizawl ram tha thleng thla hmasaho hi an aia fing zawk leh tam zawk hnam dangin an lo chin ral ta a, vawiinah hi chuan hnam khawngaihthlak tak, mahnia ding chhuak thei tawh lo dinhmunah an lo ding ta hial mai. Keini hi khatih hunlai khan an aia mawl zawk leh chak lo zawk kan la ni a. Chuti chung chuan phai ramah hian lo tla thla ta ila anni ai hian kan ral nasa dawn. Vawiina Mizo hnam ropui taka lo ding chhuak ta leh Pathianin khawvel tieng tura kohhran ropui tak min lo dinsak hi hmuh tur a awm lo mai thei a ni. Chuvang chuan hnam dangte luh theih lohna tlangram chhengchhia leh ei leh barte pawh thar theih mang lohna tur hmunah hian kan hnam hi Pathianin min thukru a, he ram hi kan hnam chenna atan min lo pe a ni.

Pathianin he ram min pek chhan chu a chhungah hian a duhzawng ang taka a hnam thlante kan chen a, a thu chu kan hnam nun inphuar khawmna a lo nih a, chumi atanga rah tam tak chhuak a, khawvel tieng tura feh chhuah hi ram min pek chhan leh hnam min din chhan chu a ni ta a ni. Chutiang tak ti tur chuan kan hnam hian ke a pen em tih erawh kan ngaihtuah a ngai viau a ni. Kohhran hrang hrangten missionary tam tak thawn chhuakin hna thawk mah ila, kan nunah kan inenfiahna tur thil tam tak chu a awm a ni. Kohhran pawl hrang hrangte hian kan pawl hrang rilru hi eng emaw chen chu kan pawl invawn nun nan leh kan kohhran tih chaknan kan kalpui a ngaih chin chu a awm ngei mai. Amaherawhchu Pathianin hnam khat, chhungkhat atana min koh kan nih avangin kan pawl hranna rilru hi kan lak len lutuk chuan Pathian min koh chhan hi kan ti hlawhtling thei lo ang. Pawl hranna rilru paih a, Lalpan min kohna chhan zawk Pathian ram tizau tura inpumkhat zawka hna kan thawh hian Pathian duhzawng chu kan ramah hian tih puitlinin a lo awm chauh dawn a ni.

Rinawmna thu-ah hian kan inen fiah a ngai ta a ni. Hmanah chuan kan pi leh pute khan kawng an khar a, thingfakin kawng an do mai a, tumah an lut ngai lo. Nimahsela tunah chuan tala lianpui pui, pakhat mai ni lo pahnih pathuma kan kalh pawhin kan him zo ta lo. Thin thi-in mi tam tak kan mu thei lo a, kan ralmuang lo tlat a ni. Kristian-na kum za chuang kan hman mek laia kan hnam nuna rinawmna lo tlu chhe mek hi a pawi hle a ni. Chuvangin kohhran tinte hian rinawmna hi inzirtir thar leh ang u.

Ruihlo-in kan thalai tam takte a tibuai a, nunna chân pawh an tam ta hle. Tin, mipat hmeichhiatna thu-ah pawh kan hnam hi kan hming a hliau ta hle mai. Hemi kawnga inthlahdah leh Pathian ngaihsakna nei loa nuam chenho reng reng hi a tawpah chuan hnam tlu chhia an lo ni fo thin.

Ka sawi leh duh chu zuk leh hmuah thu hi a ni.Kan ram hi India ramah mipui cheng zat atanga chhuta zuk leh hmuama insum lo ber kan ni. Zir miten an han zawt kual a, sim tum, sim duh percent chu a hniam em em mai a ni. Nu leh pa mai ni lo, naupang zawkte thlenga zuk leh hmuam kan buaipui ta hi a pawi hle a ni. Hnam dang an lo kal a, Mizote chu Kristian an ni a, kohhran ropui tak a ding a ni, kohhran chak tak a ding a ni tia kan chanchin zir tura lo kalte hian engatinge heti tak maia zuk leh hmuam in uar, an ti thin. Chhan a har, sawi tur kan nei thin lo. Hnam dangten min han hmuh hian Lal Isua hmel an hmu thei lo a, ringlo mite tihawm nia an ngaih avangin Lal Isua hmel hi an chhiar thei thin lo a ni. Chuvangin kan thil tih leh chin lai mekte hi i ngaihtuah chiang ang u. Sim turin kan thinlung pawh i buatsaih ang u.

Engtin nge kan tih tak ang le? A insiam tha hmasa tur chu sorkar ni lo-in kohhranho hi kan ni. Pathianin Israelte a chhungkua atan a thlang a, mahse amah an theihnghilh thin avangin nasa takin a hrem thin a ni tih kan hria. Keini pawh Pathianin he ram hi min pe a, ram chu LALPA ta a ni. Kan chenna atana min pek, kan chen hawhna a ni. A chhungah hian him taka kan chen reng theihna tur chuan he ram min petu leh hnama min tungdingtu tana rinawma kan awm hian kan hnam hi chu a dam ang a, tundinin kan awm zel ang. Amaherawhchu Israel-te anga kan inthlah dul rawh chuan chhiatna hi kan bak a ni. Kan rama sualna lo pung mek leh min chim veltu hrang hrang han ngaihtuah hian kohhranhote hi ngawih a hun tawh lo a, aw kan chhuah a hun a, hna kan thawh a hun a, tan kan lak a hun a ni. Kan rama sualna chi hrang hrang rawn lut te hi hnawtchhuak leh hneh tura Pathian ralthuam famkima inthuam chunga ke kan pen hi a va tul ta em.

Kan ram sorkar pawh hian theihtawpin hma a la thin a, sorkar hmasa leh tuna ding lai pawhin theihtawp an chhuah thin. Nimahsela sorkar chakna leh sum leh pai hausakna atang hi chuan hneh theih a ni lo a, setana hmanrua mai a ni leh zawk thin. Chuvangin, chung zawng zawng chu a kal dik theihna tur leh sorkarin a hmalakna te, hmanrua a rawn chhawp zawng zawngte hi hmanraw tling leh tangkaia hman a nih theihna turin Pathian kohhranhote hian tawngtaina nen kan lo thawhpui a, tan kan lo lak ve hi kan tih tur chu a ni. Chu chuan sorkar hmalakna hi a tipuitling thei dawn chauh a ni. Hetih lai hian sorkar hmalakna lamah pawh a nih tur ang ni lo, a hmanna tura hman loh, ram changkanna tura buatsaih ni si changkanna tur atana hman theih tak loh thil tam tak hi a awm a ni.

Heng thil zawng zawng hi kan tih reh a, Pathianin he rama min din chhan ang ngeia kan awm a nih phawt chuan khawvelin he ram hi a thlir ang a, khawvel tieng turin min buatsaih dawn a ni. Heng zawng zawngah hian Kohhranhote hian mawhphurhna kan nei a ni tih i hria ang u. Pathianin a hnam atana a kohte kan ni, a chhungkua atana a thlante kan ni, intih hranna rilrute hian kan hnathawh tur tam takte min tibuai a, chuvang chuan inpumkhatna rilru pu turin inbuatsaih thar ang u. Kohhranho te hi kan tih tur dik tak, khawvel tieng tur leh Mizoram siam tha tura tangkaia kan din theihna turin a mawhphurtu lian ber kan ni. Ram chu LALPA ta a ni, Lalpan a thu malsawm rawh se.

RAM CHU LALPA TA A NI

Sam 22:28, Sam 37:3, Eph 2:10

http://2.bp.blogspot.com/_Ewm6Uyf8N5s/SiRdGiyda_I/AAAAAAAABh8/qmwK4zPjDtI/s200/12.jpgPathianin a tirin lei leh van a siam a, thil dang zawng zawng a siam hnuah Mihring a siamu miring chu a thilsiamte enkawltu atan a dah a, chi thlah punga leilung dap chhuak turin min din a ni. Chu leilung (Planet Earth) chu kan enkawl tura min pek a ni.

Khawvel history kan en chuan a tir atangin he khawvela thuneihna hi mihringin an inchuh nghal a. Ngaihdan chi hrang hrang nei - Anarchist, democrats, communist, Nazis, capitalist, liberalistetc te chuan an ngaihdan hmangin khawvel awp beh an tum thin. Tunhma chuan Geography hriatna a la zim hle a, Roman Empire chuan an khawvel hriat chin chu an lo hneh a, Chinese Empire pawhin an khawvel hriat chin ang ang chu an lo awp tawh thin. Chutiang chu Arnold Toynbee chuan Universal State a ti a ni.History-a Civilization kan hriat theih chin chinah hengte hi kan
hmu :-
a) Assyrian Empire :- 934 BC.. Chutih lai chuan an ram leh a chheh vel mai
bakah Mesopotamia thlengin an awp thei.
b) Macedonian Empire :- Alexander The Great-a hnuaia he
lalram hian Greek ho ram hriat theih ang chin chu a hneh a ni.
c) Roman Empire :- Pax Romana hunlaiin Rom Lalram chuan
Mediterranean khawvel a awp bet vek a ni.
d) Caliphate :- Muslim zawlnei ropui Mohammah-a tha chhangdawltu nia
sawi, Caliph-te chuan an lalram an zauh nasa hle
a, Persia ram leh Africa hmar lam, Sind leh Punjab (Pakistan) thlengin
an awp.
e) Mongol Empire :- Gengiz Khan-a (1206) hnuaiah he Lalram hian khawvela
mihring awm zawng zawng hmun thuma \hena hmun khat zet an awp.
f) Ming Empire (1405):- He Lalram hnuaiah hian Chinese ho chuan sumdawnna
hmangin Southeast Asia, India, Arabia, Africa te an lo awp bet tawh a.

g) Spanish Empire (1580):- Spain leh Portugal Lalramte chuan Philip II
hnuaiah Exploration lama an hmasawnna nen khawvel ram tam tak hnehin
America chhim leh hmar, Europe ram tam tak leh Far East Asia te an awp.
h) French Empire :- An hruaitu ropui Napoleon Bonaparte hnuaia khawvel hneh
turin theihtawpin hma an la
i) British Empire :- Queen Victoria lal atangin Sapram chuan khawvela mi
cheng hmun 5-a thena hmun 2 an awp,
j) Soviet Union :- The Bolsheviks ho chuan communist ngaihdan
hmangin khawvel hneh an tum.
k) Nazism : Mi hrat khawkheng, Adolf Hitler-a hovin rorelna duhin khawvel
an chawk buai.
l) USA :- Anni hian an Foreign Policy leh technology lama an thiamna hmang
tangkaiin khawvel an awp.

Tharuma inbeihnaa Khawvel hneh an tum hnuah tunlaiin khawvela ngaihdan hmang mithiam tam tak(Philosopher) te chuan an Ngaihdan (Idealogies) hmangin ram lak antum a. Leilung hausa leh sumdawnna lama hmasawnten an sum neihin ram lak an tum bawk a, Chutiang zelinTechnology lama changkang tak takte, Media lama hmasawnte, Musicians te leh Sports lama mithei falte leh Milar (celebrities) te chuan an talent hmang hian khawvel hi hneh an tum ta vek zel a ni.

Kan sawi tak ang hian khawvela Sawrkar lian tak takte chuan khawvel hneh tumin hma an la thin a, Mithei falten an theihna leh an neih hmangin he khawvel hi awp beh an tum thin. Mahse a tak takah chuan Khawvel/Ram chu Lalpa ta a ni
(Sam 22:28).

KTP te chu Ram enkawltu kan ni :- Chu Lal ram, kan Pathianta chu enkawl tur hian keini KTP member-te hi Ram neitu Pathian chuan he leiah hian min dah a ni tih hi kan hriat a pawimawh hle. He ram hi sawrkar thiltitheite ta a ni lova, mi hausate ta a ni hek lo, milarteta a ni lova, khawsak phunga mi changkangte ta a ni lo. kan LALPA ta a ni. Ani chuan chatuanin he lal ram ro hi a rel dawn a ni.

Chuvangin KTP member-te hian he ka Lalpa ram enkawl thu- ah hian
mawhphurhna lian tak kan nei.

Tunlaia kan hmasawnnain a rawn ken tel, Electronics leh Information Technology te hi KTP te hian mi kutah i dah lovang u. Kan Mobile Handset te, kan personal computer te, kan Internet hman dan(Webpage, blogs, social networks) te hi KTP lo zawk hian min thununlo se, KTP te hian Pathian rawng kan bawl zau zawkna turin midangte hi luahlan i tum zawk ang u.

Chutiang bawkin Zirna lamah te, Sports-ah te, Music lamahte, leh thiamna chi hrang hrangah hian Kristian Thalaite hian he khawvel hi khalh i tum ang u. Heng Pathian malsawmna kan dawn zawng zawngte enkawl tur hian mawhphurhna hlan kan ni.

Eg.. Hmanni chu Inneih inkhawmnaah KTP member, active ve tak mai hi a lokal a, a ngum a lang a, a kawrin ban a nei lo. Inkhawm pangngaiah a ha ngai lo.. KTP-a inhmang vak ngailo hian Inneih nikhua hi Fashion Trends pholanna remchangah an hmang fo. Hei hi CentralKTP pawhin a ngaimawh thil kha a ni.. Chutih laiin a KTP zawkten an inchei dan kan lo la chhawng hi chu a zialo lam a ni. Chutiang chuan inchei dan thleng hian KTP te hian kan vela mite hi kan thunun thei zawk tur a ni.

Kan Pathian Thu chuan, "Thil tha ti atan Krista Isuaah chuan siama awmin ama kut chhuak kan ni si a; chu thil tha tih chu kan awmna turin Pathianin a buatsaih lawk a ni" tiin KTP te chu min hrilha, Sam ziaktu chuan ''Lalpa chu ring la, thil tha ti rawh;He ramah hian awm la, rinawmna um zel rawh.'' min ti a ni.Chutiang chuan rinawm takin thil tha ti ila, chu thil tha tih hram hramna chu LALPA TIHNA a ni. Kan khawsak dan leh chet vel danah he Kristian Thalai Pawl hi kan advertise reng tur a ni ang. Chumi atana Model tling ni thei tur chuan i inbuatsaih theuh vang u. Kan inkhawm kal danah te, fakhla kan sak danah te, Pathian kan biak danahte hrim hrim khawvel miten an Idol an ngaihsan ang aia thutakin ti ila, he kan rawngbawlna hian rah duhawm tak a chhuah ngei ang.Chutichuan kan KTP KUM PUAN angin mihlate¢n rawngbawlna huanga
lo luh an chak ang a, kan thupui chu hlenchhuahin a lo awm ang.

Ram chu Lalpa ta a ni si a, chumi Lal ram tana thawk thei tur leh a neitu nihna tak tak chang tur chuan KTP member-te min ruat a ni.


Sam 22:28 Ram chu LALPA ta a ni a: Hnam tin chunga rorêltu a ni si a.
Sam 37:3 Lalpa chu ring la, thil tha ti rawh;He ramah hian awm la, rinawmna um zel rawh.
Eph 2:10 Thil tha ti atan Krista Isuaah chuan siama awmin ama kut chhuak
kan ni si a;chu thil tha tih chu kan awmna turin Pathianin a buatsaih lawk a ni.

(He Sermon hi Aizawl Bethel Presbytery KTP Meet-neih zawh taka.Meet Chairman leh Chanmarians Blog/site Admin- Pezo in Meet tawp zana a thusawi a ni e.)

KA THIAN ENGINNGE HRUAI CHE?

Galatia 2:20 - Krista hnenah khenbehin ka awm ta; nimahsela ka nung a ni; keimah erawh chu ka ni tawh lo. Krista chu keimahah a nung zawk a ni; tin, tuna tisaa ka nung hi rinnaa nung ka ni - Pathian fapa, mi hmangaiha ka aia inpetu rinnaah chuan.

Greenland ramah chuan vurtlang chhiarsen loh a lang nuaih nuaih mai a. A then chu vurtlang te tak te te an ni a, a thente chu lian tak tak, ding luah mai an ni hlawm. Vurtlang te deuhte chu kalna lam pawh nei lem lo leh awmze nei vak lova an chet laiin a lian deute chuan kalna lam bik an nei thin. A chhan chu: a te hote kha chu thliin a chhemna lamah an lengkawi mai a, vur tlang lian hote erawh kha chu tuipui luangin a luanna lamah , a luandan zawngin a chetpui thin a ni.

Hetiang deuh hian kan nunah pawh hian thil pahnih, min hruaitu a awm ve thin. Thli chuan kan nuna thil danglam, hriat lawk loh thil lo thleng thin leh buaina te a entir a. Chumi rualin heng lungngaihna leh harsatna chhumpui min hual veltute kiangah hian thil dang, chak tak leh thiltithei tak, hmuh theih ni lem lo hi a awm ve bawk a ni. Chu chu engnge ni? kan tih chuan Pathian hmangaihna thu tak, kan tana luang hi a ni. He hmangaihna, tuipui anga chak tak leh nghet tak anga luang hi a ni, kan thlarau kaihruaitu atana kan hman tur leh kan rin tur zawk chu.
Sam ziaktu kha mi vervekte hmuingilnain a rilru a tihbuai lai khan Pathian nena inpawl turin hmun thianghlimah a lut daih a, thil awmze dik tak a hmu thiam chiah a nih kha.(Sam 73:17). Joba khan harsatna namen lo a tawh lai pawh khan, "Mi tihlum hial mah sela, amah chu ka nghak cheu vang: Mahse, a hmaah ka kawng chu ka tan ang" (Joba 13:15) a ti a nih kha. Tin, Paula, ‘Krista ruala khenbeh’ a nih inhretu khan, "Lehlam lehlama neksawrin kan awm a, nimahsela kan bei a dawng si lo" (II Korinth 4:8) a ti thei a nih kha.


Pathian kan rin tlat chuan, thlemna thlipuite hian min chim ngai dawn lo a ni. Pathian hmangaihna leh thiltihtheihna chuan min kaihruai zel zawk dawn a ni.
(Pathian nena thlipui tawrh chu a tel lova hmun nuam taka awm ai chuan a tha zawk a ni) - Benz

LALPAIN A DUH A NI

(Matthaia 21;1-3)
PC.Vanlalnghaki.

“Tin, tupawhin in hnenah engpawh an sawi chuan, “Lalpain a duh a ni,” in ti ang a, tin, ani chuan a rawn tîr nghal mai ang.” Mat.21:3
Kan Lal Isua khawvela a awmlai khan vawi khat chiah ropui taka chawimawi a ni a. Chutia chawimawia a awm Tum chuan, mi sabengtung a hawh nghe nghe a nih kha.

A hawh turin a zirtirte a kaltir a, an duhna lama kal tir mai ni lovin, an hmazawn khuaah a ni a tirh ni. A hawh man lam sawi a ni lo va, tupawhin ngaihdan an lo sawi chuan ‘Lalpain a duh a ni’ tih kha a tirh dan a ni.


Tun hunah hian kan ram ringtu nun belhchian dawl lo lutuk leh ringtu inti leh ring lotute hriat hran har ta lutukah hian leh, ram rorelna leh a huho mai ni lo, kan khawsakna theuhvah hian he kan mimal nun kut leh ke, kete hi kan Lal Isua’n Lal a nihna tarlan nan leh a ropui puanchhuah nan a chuanna atan min duh a ni. Kan ngaihdan leh duh dan rawlh lovin, kan sual chung chung pawha kan Lal Isua’n a chuanna taksa ni turin min la duh hi lawm nachang hriain, a lam hawi ila, vawiin hian kan thinlung leh nun luahtu thil tha lo min thlung bettu zawng zawngte phal takin, Thlarau Thianghlim i phelhtir ang u.
Tin, a phelhsak tawhte pawh hian mi nun saltangte kan phelhsak dawn chuan kan hmazawn theuh kan hriat chian a tul a, mi hamzawn lam sawisak lovin lainatna leh duhsakna tak tak nen thil dang sawi lovin ‘Lalpain a duh a ni’ tiin thlarau saltang leh zu leh ruihhlo phuar beh tlatte thlarau lainat tak chungin kan lal Isua min tirhnaah hian kan hmazawn theuhvah thawkin inpe thar leh theuh ang u.

DANGLAM LO NUN

‘Danglam Nun’ a awm rualin ‘Danglam Lo Nun’ hi chhui chian dawl leh duhawm a ni ve tho bawk. Ringtute hi danglam nun nei ve lo tur, pangngaia nihphung leh ze nghet a ni tur a ni. Khawvel a danglama, a inthlak kuallai hian kan nun hi khawvel mil emaw, ringlo leh piangthar lote tih dan entawna, an chîn dan leh tih ang ti ve ngawt thei kan ni lo. Kan bula mite hian Ringtu - midangte aia kan danglamna hi kan nunah hian an hmu fo tur a ni.

Chu nun danglam tak - kan bula mite an danglam laia Krista avanga kan nun nghet ‘Danglam ngai reng reng lo’ chu mite hian hmuh an beisei leh an duh chu a ni tur a ni. Ze nghet leh pangngai renga nun hi a pawimawh a, chu zia chu Krista pawh hian a hnung zui turin a duh a ni. Khawvel thila peng bo ngai lo, engtiklaipawha Amaha rinna nghat mi ni turin kan insiam fo a ni.

Mi tam tak, kan bula mite tih theih leh duh ang apiang ti ve thei an awm thin; chutianga danglam lo lam ni lovin, Kristaa rinna danglam lo chu kan nihna tur a ni zawk a, chu chuan Kristaa kan rin nghehzia leh hmuhfiahzia a tilang fo. Hei hian ze nghet leh nun fîm, ril a keng thin. Piangthar leh ringtu dik chu midangte laka a danglam laiin Kristaah chuan a rinna leh duh zawngte chu khawvel thil angin a nun a danglam ve lo.

KRAWS-A INPUMKHATNA

Upa Lalthankima(L)


'He rilru, Krista Isua pawha awm bawk kha,nangmahniah awm rawh se." (Phillipi 2:5)



Paula hian Krista rilru min hrilha ni. Mihringte angin a lo piang. Bawih angah a insiam, a inngaitlawm. Kraws-a thi khawpin thu a awih. Hetiang rilru hi Kristaah chuan a awm a ni. A inngaihtlawmna chu a thuk khawp a, thi khawpin a nun a pe a. Chu thihna chu kan aiah, kan tana a thihna a ni a. Chuvangin, kraws-ah chuan Isua Krista nun pumkhat kan lo ni thei ta a ni. He pumkhatna avang hian ringtute pawh inpumkhat tur a ni tih Paula’n a sawi, "Rilru hmun khata awmin, hmangaihna hmun khat neiin, inthuruala rilru hmun khat neiin," a ti a ni. Midang ngaihsak hi kraws atanga zir tur a ni tih a sawi. "Mahni ta mai en lovin, midang ta pawh en theuh zawk rawh u, a ti a ni.

Ringtu chuan koh a nihna awmzia chu a hre thuk deuh deuh ang a. Sual leh khawvel leh mahni inthihsantu nuna nung turin thiltihtheihna pawh a dawng ang. Ringtu tinin mahni tawk theuhvin, mahni nunah kraws chhinchhiahna put theuh tur a ni. Chu chhinchhiahna chu engnge ni? Kraws chuan thihna te, tisa chakna te a hneh tih hi. Miin nunna thar a lo nei ta. Tisa chakna sual pawh a do thei ta. A Tlantu, atan khenbeha awm khawpa inngaitlawm chu a hmu a, a inngaitlawm ve ta.


Lalpa duhzawnga nung leh khawsa turin a nun a pe duh ta. Heng hi kraws chhinchhiahna chu a ni. Kraws hi sikul angin lo sawi ila. Kraws-in nun a zirtirna sikula a kaltechuan ngaihsan em em an nei ang. Chu chu TLANNA thu hi a ni. Kraws-ah chuan tlanna a lo lang a, chu tlanna hmu chiangtu apiang chu Tlantu nen an lo inpumkhat zel ang.


(He sermon hi Upa Lalthankima (L) ‘Lal Isua Zui’ tih a ziak atanga lakchhuah a ni.
)

PATHIAN HNEN THLENNA KAWNG

Buaina tawk ngai lo ila,Thinglung pawh hi hlim reng se, Chu ram mawi chu ka zawng ang em?

Zan awm ngai lohna ram chu,Chauh chang te nei lo ila,Phurritin min delh lo se,Pathian pek thlamuanna chuZawn nachang ka hria ang em?

Damloh chang te awm lo se,Na pawh tuar ngai lo ila,Chhandamtun min kai dawn se,Ban nachang ka hria ang em?

Lungngaih hre ngai lo ila,Engmah hloh ngia lo ila,Ka thalrau hian kraws bulahHahdamna a zawng ang em?

Ka duhthusam thilte chu,Nitin nei thei zel ila,Pathian hmaah thingthiin dil nachang ka hria ang em?

Khawvawt hrehawm ka tuar nanThlasik hun hi awm lo se,Thal khaw lum leh nuam tak hiNgaih nachang ka hria ang em?

Hei hi mahni ka inzawt, a chhanna pawh a chiang sa damchhungin hlim reng ila,Na pawh tuar ngai lo ila,Pathian ka ngai lovang a,Koh nachang pawh ka hre lawng,Lungngaihna tlakbuakte chuan,A hmel an zawng zawk fo thin,Tuarna avanga hmututen an hmuh ang a chiang rengin,Tumahin kan Pa hmel chu an hmu dawn si lo va.