.: FRESHERS’ MEET

Khawvel mite hun hman dan a inang lo, kan hun thlirlawk dan pawh inang hek suh. He khawvela kan kum chhiar danah chuan kumin hi mi thenkhat chuan ‘Hun Tawp’ an tih hun kha a ni tawh a! Mahse, keini zawng ‘Pa chauhin a hria,’tih pawmtute kan ni a, kan hma lam hun atan ruahmanna kan siam chho ut ut tho mai. Kum za dam tur angin hna thawk ila, naktuka thi tur angmai tawngtai bang lo bawk ila a fuh ang.

Nia, January ni 4, 2012-a Branch KTP kumthar committee-in a rel angin January ni 28, 2012 (Inrinni) khan Mosia Garden & Picnic Spot, Sihhmuiah Freshers’ Meet neih a ni a. Kan hun duante tluang taka neih a ni bawk. Tlak deng ni kang, ni chhuah leh chhuah loh hriat dawn pawha tlak lam en daih veng atang chuan hun tiam tak chhuah hi chu thil har a ni chek a niang chu, zing dare 9:30 velah chuan a liam thla tur ang chu kan liam thei hram a. Kum lama naupang zawk an thawk chhuak tha bawk a, a kal tur ang kan han chuan kim meuh chuan lirthei indap chawp a ngai deuh tlat mai. Leng lo khawp kan chhuak kha a lawmawm hial zawk si a, a theih ang angin kan han inbeng a, a kal tur anga chhuak chu kan kim thei hram a. Lirthei kal tur zawng zawngte’n KTP Flag tar chunga R.V. kan han pel thla te kha a nuam danglam ve hrim hrim. Tumah han hnufual kan awm lova tluang takin kan thleng thei a.

A hmun kan thleng chu boruak vawt tak pawh tleimin a lo kang tawh a, a zia deuh chuan a hriat. A hmunhma chei thar deuh a la ni a, a thianghlim hle bawk. He Picnic spot hi January ni 4, 2011-a Rev. Vanlalzuata hawn a ni a, KTP hun hmanna atan chuan a fuh khawp mai. Pathian hian Thalaite hi kan hlim a phal a, chu chu bawhzuiin mahni tuina zawng lamah theuh kan bur ta! A then choka lamah rawngbawlin - Sa, chaw chhum, bean siam, antam then, purun leh bahkhawr chan... thingpui lum tawk an awm bawk. Kan patron member (i ti mai ang!) Pu Robert-a te nupa pawh an ti ti dun hman lo, kan ei tur siamin an buai phili a ni ber. Tleirawl lam thung chu le, nunchan an zir emaw tih turin tui cheng an awm, volleyball beng an awm bawk. Sukbuk leh pipu pawh a awl hman lo. Kil khata thutthleng then thei a lo ti ti melh melh pawh an awm a. Ei tur ken ang angte theh a mahni tawka lo tlei ve em em pawh kan bang lo. Kan buai dan a inchen lova, tumah kan inphut tlang hek lo. Mahni burna lam lamah kan bur a ni ber e. Chutianga kan buai em em lai chuan kan Musician-te’n min lo awi dup dup reng mai bawk a, chung hlim tak che vel thla te chu lak kim loh hlau awm fahranin cameraman hovin an vil reng bawk a, thla la tur pawhin kan insiam tha hman mang lo chu a ni ber e!

Chawhnu dar 1:30 a chanveah hunserh kan hmang a. Hunserh hi Tv. Lalfakawma, Branch Asst. Leader-in a kaihruai a, programme hlimawm tak hman chho zui nghal a ni a. Tv. Fk-a leh a thiante rawn zai chuan min awi hneh hle mai. Hla pahnih - ‘O Lord, your great’ ; ‘Do Lord’ tih hla hneh takin an rawn sa a. Hemi zawh hian Nl. Baby-i a rawn zai leh a, ‘I tlai ang e’ tiin member-te min awi hneh hle bawk. Indaih loh vang pawh ni lovin, ruat lawksa a nih avangin hunserh hruaitu Tv. Faktea pawhin 'Zalenna dar' leh 'The Hardway' tih hla hnehtak in a rawn sa a. Hemi hnu hian Pu Sanghmingthanga, Branch Finance Secretary-in thuchah tha tak a rawn sawi bawk a. Kum 22 chhung KTP-a hun a lo hman tawh atanga a tawn hriat atangin a sawi chho a, hunin a daih lo deuh chu niin a lang.
(Chanvo neitu te..)

Group tin atanga Fiamthu Thianghlim thawh tura ruatte koh chhuah an ni a - Tv. Madawnga, Tv. B. Mama, Tv. Feltea leh Tv. Chhuanawm a te’n min tinui nasa hle. Tin, Chhuanawma’n Quiz leh Games hlimawm tak a rawn buatsaih chuan min tinui nasa hle mai. Chuan le! Item-a kan thulkhung - Tv. Madawnga kan che vel chuan hahni hil thawt khawpin min nuihtir a! Tlachawp programme-ah pawh kan branch nulate duai lohzia tarlan nan make up buaipuitu lam Nl. Apuii, Nl. Lynda-i leh Nl. Atei an ko chhuak leh band introduction an nei chuan mipui lawm a hlawh hle nghal a. An band hming hi ‘The Aigupta Future Rock Band’ a ni tawp mai, pui tak a ni. An tawp hleithei lo tep a ni. Hun khar nana Tv. Faktea’n kan hla chuam ‘Swing Low’ tih hmanga min han awi leh kan han lam suau suau mai kha a va hlimawm em.

Hunserh kan hman zawh hian mahni tuina lamah theuh kan bur leh a. A thenin chaw eina lam an buaipui tan bawk a. Tlai dar 3 bawrah member 110 bawr zet innek leh inchuh buai miah lovin chaw dawh turin kan han intlar kha hmuh nuam ve deuh a nia sin. Thenkhat tan chuan a la hma a ni thei, mahse chaw ei hun kan tih tawh miau avangin puar tak chuan kan fatu lam siam chu kan kil tlang a. Chaw kan ei zawh tawhah pawh hmanhmawh em em lovin mahni tuina lamah theuh kan phe leh a. Kal dawn leh haw dawna tleirawl mawng zawng tak tak bungrua thiara han che fel hmuh khan kan branch hmakhua chu a engin a hriat. Lalpa tana baal hmaa thingthi ngai lo an lo va tam em! Tlai dar 4:30 velah mahni in lam pan turin kan rawn tlan haw tlang ta a ni.
He Freshers’ Meet hi ‘Picnic’ a ni lo tih hriat a tha khawp mai. Thenkhatte’n KTP Picnic anga lo sawi an awm. Tui chentheihna leh hmun danga chhuak avanga picnic kan ni lova, Member thar leh kumin chhunga rawngbawlho tur kan nih anga inpawh tak leh Pathian rawngbawl chunga hlimna kan neih theihzia tarlan nan Branch Committee chuan ngun taka a ngaihtuah hnuah thutlukna siam a ni a, kan hlawkpui ngei bawkin a rinawm. A hmunhman kan thlan pawh hi a sual lo khawp mai. Hawi velinthil dang rilruah a lang thei tlat lo. Pathian thu ziak leh milem tar/ziah atang chuan he hmun hi nawmchenna sual a nih loh hmel. Zu leh sa, sual a inlar loh a rinawm. Khai mah aw - “Zilhhau fo pawha a ring tikhawng tlat chu vawilehkhatah tihtliahin a awm ang a, tihdamna a awm lo vang,” (Thufingte 29:1); Chapona a lo awmin mualphovin a lo awm a, Inngaitlâwmte hnênah chuan finna a awm (Thufingte 11:2); “Thalaite u, in that lai chen ula, i la naupang viau lai hian hlim rawh u, amaherawhchu Pathianin in chungah ro a rêl dawn tih rhe reng ang che u” (Thuhriltu 11:9) tih thu ziak lian pui chuan chhak lam kovah hmuh thelh rual lovin min chhawn a. Hall chhung lamah han lut ila - Krista lokal leh lai lem lian zetin a lem ziah a ni a. Nun la nei lo tan phei chuan hmuh chakawm loh khawp a ni zawk. Chumi bulah chuan sawmute hnar ngai lo Lal Isua leh thiandun pahnihte Emau kawng an kal lai thla thinlung tihahdam tak siin a inziak bawk. Kan piah ral tlanga fianrial nei duh tana ‘I Tawngtai ang u’ tih inziak khan min sawmtu sawmna kha hnar a har thin. Chhak lamah han chho ila - Mosian thlalera ro a khaikan lai lem mawi leh nalh zetin a inziak a, he picnic hming vuah chhan ni awm hliah hliah a ni ka ti. Lal Isua hova zanriah hnuhnung kil lai leh eden huana Adam leh evi chetla lai kha mitin ve lo mah ila heng lem han hmuh hi chuan hai theih a ni lo. Hriattirna an ziahah pawh sual an huatzia hi a la hmuh theih zel a, sawi sen a ni love, heng zawng zawng han hmuh hian thla a muang sawng sawng thei a ni.

Aw le, a tawp berah chuan Thalaite Lalpa hian kan hlim a phal a, kan thin tinatu a awm hi a hlau em em zawk a ni. Chuvangin kan vanglai hi chen turin min fuih a, min chah a ni. Mahse... chu thil chu delhkilhtu tha tak a awm... ‘I vanglai hian i siamtu hrereng rawh’ min ti lawi si a ni. Kan hlim dan te, kan vanglai chen danah Lalpa a lawm ang em tih infiah fo ang u. Thalai i nih chuan KTP huangah tel rawh, he pawl ropui taka member i nih hi lawm rawh. Chumi ti chak tur chuan Lalpan a ko che a, chhang rawh.
(Thlalak thenkhat te..)