Khawvel a tawp dawn hnai em ni ?

Tunlai hian khawvel tawp chungchang chu mi tam takin an buaipui nasa hle a. Hetianga sawi a tam tak viau chhan hi chu Mayan Calendar ah December ni 21, 2012 hi khawvel tawp hun tur angin a lang a ni. Mayan ho, Nostradamus, Thuthlung Hlui hunlaia zawlneite, Isua zirtirte bakah tunlai scientist te chuan kan solar system ah planet thar ‘Nibiru’ a pian tur thu an sawi lawk a, he planet thar hi ‘12th Planet’ emaw ‘Red Planet’ emaw ‘Planet X’ tiin emaw an ko a. He planet thar hian kan chenna khawvel hi a rawn su chhe dawn niin Mayan ho chuan an ngai a ni.

Buaipui tanna : December ni 8, 2006 a Mel Gibson-a film siam ‘Apocalypto’ an tihchhuah atang khan Mayan Calendar hian ngaihven a hlawh thar leh viau mai a. Heng mite hian khawvel tawp hun chu an buaipui ber a ni.‘Apocalypto’ tih hi Greek tawng a ni a, a awmzia chu ‘Thil inthup khuh hawnna leh bul tan tharna’ tihna ang a ni a. Hei hi Mayan hovin ‘Fin de los Tiempos’ an tih, khawvel tawp hun tur an sawi nen a inrem hle a, hei vang hian an ngaihven phah lehzual a ni.
Mayan Calendar : Mayan Long Count Calendar ah chuan ‘End Date’ hi 13.0.0.0.0. ah tihlan a ni a. Hetah hian an Calendar pawh a tawp chiah a, hemi ni hi ‘Winter Solstice’ chiah a nih bakah December ni 21, 2012 chiah a ni bawk a. Hei vang hian he ni ngei hi khawvel tawp ni a nih ngei an ring tlat hlawm a ni.Mayan ho hian 3113 BC khan Calendar hi an siam tan a. Calendar chithum an nei a, pakhat chu ‘Tzolkin’ an ti a, hei hi an Calendar serh ber a ni a. Hei lo hi agricultural calendar an tih mai ‘Haab’ a awm leh a. A pathumna leh khawvel tawp chungchang tarlangtu bera an sawi ‘The Long Count’ a awm leh a ni.A hnuhnung ber ‘The Long Count’ bik hian khawvel tawp hun tur chu a tarlang a. He calendar hi kum 5000 apiangin a intan thar leh ziah a, tuna a hun kalpui mek hi BC 3114 vel atanga intan kha a ni a. Mayan ho rin dan chuan hun hmasa ber chu Pathianin kan chenna khawvel leh a chhunga chengte a siam lai kha a ni a. Hun hnihna leh hun thumna ah chuan Pathianin hlum hmangin mihring a siam bakah thing leh hnim te a siam a. Tuna kan hun hman mek hi hun lina a ni a, hun tawpna niin an ngai bawk a ni.
Ngaihdan hrang : Mayan ho rin dan hi mi tam tak chuan an ring tawh viau mai a, anni ho lah hi hnam fing tak, mathematics, engineering leh astronomy lama thiamna nei sang tak an ni a. Hei mai bakah hian van boruak chanchin vel pawh an hre hneh hle bawk a ni.‘The Long Count’ in a tarlan dan chuan he calender hun hi kum 5,125.36 thleng daih tur a ni a, he hun hi December ni 21, 2012 ah a tawp chiah dawn a. He hun kal lai mek ‘The Great Cycle’ an tih mai hi a tawp a nih chuan khawvel pawh a tawp nghal turah an ngai nghet tlat a ni.Mi thenkhat chuan Mayan ho rin dan hi an tawmpui viau laiin thenkhat erawh chuan khawvel hi a tawp mai an ring lo hle thung a. Heng mi ho ngaihdan chuan khawvel hi tawp lovin hun thar danglam tak, mihring thiamna leh finna mai bakah kan taksa lan dan thlenga danglam hun kan thlen an ring ve thung a ni.
Calendar dang : Mayan calendar ah chuan khawvel tawp hun tur hi tarlan tawh angin December ni 21, 2012 a ni a, hetiang deuh hian calendar hrang hrang pawhin tawp hun tur an nei ve nual bawk a. Khawi ber hi nge rin ber tur hriat thiam a ni chiah lo a, Mayan ho calendar hi a dik ber tih theih a ni tlat lo.Hindu ho chuan 2003 khan an pathian Krishna chu khawvela lo kal turin an ring daih tawh a, tun thlengin an la beisei chhuak lo a. Muslim calendar chu 2076 a tawp tur a nih laiin Jewish calendar chu 2240 ah daih a tawp dawn bawk a ni. Carl Johan Calleman chuan Mayan calendar hi uluk takin a zir a, ani chuan ‘The Great Cycle’ hi October ni 28, 2011 a tawp tur angin a zirchhuak thung a. A zir dan chuan September ni 8, 2040 ah planet te chu an insiamtha leh dawn chauh a ni.
A tlipna : Khawvel tawp hun tur hi tunhma deuh atang tawhin mi tam tak chuan an buaipui nasa hle a, mahse tun thleng chuan a la tawp lo zel chu a ni a. Hetiang sawi sep hi awlsam taka lo ring ve zung zung chi hi khawvel hmun hrang hrangah an awm zel lehnghal a. A chunga ka’n tarlan takte pawh khi miin lo ring se tih vanga ziah a ni lo a, kan rilru sen zau zawkna atan leh hetianga sawi hluai hi a dik kher lo tih lantirna atan a ni zawk a. Miin an sawi nasat deuh avanga ni ngei tura lo ngaih ve ngawt chu a fel lo thei viau a, keimahni leh Pathian inkar hi tifel hmasa phawt zawk ila, heng thuthang mai mai hi chu kan buaipui hauh lo ang a. Eng hunah pawh khawvel tawp dawn se ringtu tak tak tan chuan engmah buaina tur a awm lo a ni.

(Kan member te zingah he thil hi buaipui tak tak an awm tih ka hria a, ka ziahna a rei deuh tawh na a, ka rawn dah ve leh a ni e. - TKA Hnamte)

Share