OPERATION BLANKET SUK

Thalai rual kal chhuak chu an thawm a tha, lui kam pawh khawk rum rum khawpin Blanket nawpa, rapa, sawra, zial thawm chu! Ralkhat atanga lo thawm hriat ngawt tan chuan zamawm riau zu nia! March ni 10 khan Branch chhunga group hrang hrangte chuan inthurualin Blanket suk runpui Sairang Buchali lei paih lawk pialtlep hmuah kan nei a. Hruaitute inberawna inremsiamin blanket hi suk a ni a; a huhovin, sum hmuh pawh inzah sem vek turin ruahman a ni a.

Chhuah hunbi tiamah erawh kan chhuak hman lo, a hmanhmawh zualin 407 trip khat tlatin Blanket suk tur phurin an liam thla a, a hnuah Bus pahnih khatin member dangin kan umzui bawk a. A hmun kan thlen meuh chuan a hmunhma lo hauh lawk tura kan member tlawmngai mi parukte an lo mangang tawh hle tih a hriat a. Heng kan member-te hi zan hnih ngawt mai a hmun hauh tur hian mahni inlum chhuahsanin an lo riak tawh a, an fakawm hle a ni. Inhrilhhriat ngaite kan inhrilh hnuah kan kal chhan a suk lam kan buaipui nghal char char a. Suk tur kan han vawm khawm chu huphurhawm tak a ni, a vum thur mai le! Dekchi lianah Surf nen kan chiah a, kan su suau suau mai a, chumi hnuah hmeichhe lamin a tlang leh a bal zual lai an lo brush leh a, chu chu duhtawk lovin mipa hlang, a thaza pawlin an lo vaw thum duh dup a, chu chu a chiah fai lamin an chiah leh a. An chiah hnu chu a sawr khawl, sek phiar tak takin an lo ser siah siah mai a. An her fu hnuah a thiar pawlin, tumah luh ve theih loh, ke faite chauh awmna lamah an dah a. Chutah chuan uluk takin an lo tel a, an tung fel nghal thlap bawk a.

Suk tur tam mahse, tumah tha thlah kan awm lova, kan tangrual a, kan rawtphur thiam a, chau deuh chu kan chawl mai a, tumah inphut hmel kan awm lo. Han tan tlan tak tak chuan engmahin lo dawl bik hek suh, kan su zo ve mai. Member naupang zawk an fakawm thlawt a ni. A then tan chuan KTP activity-a kan tel vawikhatna a nih hmel, mahse, mit tikham turin an awm lo tlat! Chumai a ni lo, U zawkte’na tih tur an tih chu mawng zang takin an ti mai a. An fakawm hle a, nakin lama KTP hma a eng hle a ni.

Chhun lamah thingpui leh a hmeh eia chawlh tih mai loh chu chawlh kan nei mang lova, Ei siam lam pawh Pu RTL-a te, Tv. Sem te, Tv. Davida te, Nl. RP-i leh Papii te pawh an tang hle a, puibawmtu thenkhat te nen an buai ve hle bawk a. Tlai thim dawn thleng a Blanket 208 su hah tawh member 70 zetin chaw no 90 kan kham lo kha mak viau mahse, kan hahin kan chau a, chaw lak a lo na deuh a nih pawhin a mawh love. Mi riltam ve te, mahse ei ve tak chu kan ni! Kan puar peng pawng tawh tihah tlai khaw thim thet thetah kan veng lam panin kan lo haw leh ta a.
Kan hun ruatah, kan hmun ruatah, khaw tha hnuaiah kan su thei a, vengdangte che suala nunna chan te an awm, kan tuarpui rualin Pathianin kan duhna te hriaa, dam taka he hun min hruai hi kan lawm a, lawmthu i sawi nawn mawlh mawlh ang u.

Admin: (A hnuaiah hian kan thlalak awm thin kha a lang thei lo vek ta mai a,KTP Album pangngai ah a thlir theih tho e)

Share