Upa Lalthankima(L)
'He rilru, Krista Isua pawha awm bawk kha,nangmahniah awm rawh se." (Phillipi 2:5)
Paula hian Krista rilru min hrilha ni. Mihringte angin a lo piang. Bawih angah a insiam, a inngaitlawm. Kraws-a thi khawpin thu a awih. Hetiang rilru hi Kristaah chuan a awm a ni. A inngaihtlawmna chu a thuk khawp a, thi khawpin a nun a pe a. Chu thihna chu kan aiah, kan tana a thihna a ni a. Chuvangin, kraws-ah chuan Isua Krista nun pumkhat kan lo ni thei ta a ni. He pumkhatna avang hian ringtute pawh inpumkhat tur a ni tih Paula’n a sawi, "Rilru hmun khata awmin, hmangaihna hmun khat neiin, inthuruala rilru hmun khat neiin," a ti a ni. Midang ngaihsak hi kraws atanga zir tur a ni tih a sawi. "Mahni ta mai en lovin, midang ta pawh en theuh zawk rawh u, a ti a ni.
Ringtu chuan koh a nihna awmzia chu a hre thuk deuh deuh ang a. Sual leh khawvel leh mahni inthihsantu nuna nung turin thiltihtheihna pawh a dawng ang. Ringtu tinin mahni tawk theuhvin, mahni nunah kraws chhinchhiahna put theuh tur a ni. Chu chhinchhiahna chu engnge ni? Kraws chuan thihna te, tisa chakna te a hneh tih hi. Miin nunna thar a lo nei ta. Tisa chakna sual pawh a do thei ta. A Tlantu, atan khenbeha awm khawpa inngaitlawm chu a hmu a, a inngaitlawm ve ta.
Lalpa duhzawnga nung leh khawsa turin a nun a pe duh ta. Heng hi kraws chhinchhiahna chu a ni. Kraws hi sikul angin lo sawi ila. Kraws-in nun a zirtirna sikula a kaltechuan ngaihsan em em an nei ang. Chu chu TLANNA thu hi a ni. Kraws-ah chuan tlanna a lo lang a, chu tlanna hmu chiangtu apiang chu Tlantu nen an lo inpumkhat zel ang.
(He sermon hi Upa Lalthankima (L) ‘Lal Isua Zui’ tih a ziak atanga lakchhuah a ni.)
4 comments:
Kraws thu a sawi kha a ngaihthlak nawm bikin ka hria, amah khan a tuipui bawk a. A boral hma kum 5 vel pawh khan thu a sawi dawn chuan inkhawm ka thulh ngailo, a tawngkam khat pawh kha hlu ve tlat ani. A thusawi thin 1 ka hriat reng chu, khawvel thrangzelah thuhril hna hi church ministerte chauh tih theih hun kan la hmachhawn dawn, laymen tan thuhril hna thawh theih ve tawhlo ang tih lam kha. Heti renga pastor zir chhuak an awm reng chuan la hnai vaklo mahse, thil thleng ve tur chu ala nih hmel khawp mai.
nia..A boral don khan biakin a a thusawi a piang hian Kraws thu hi chu a sawi uar khop mai.Amah ang Kohhran Upa hi vengtin hian Kan mamawh tih ka ngaituah thin a,Ka ui khawp mai
Ka mi ngaihsan....A mizia ka hriat chian hmaa ka hlauh em em.. ka hriat chian hnua ka ngaihdan letling thawk nun neitu... A thuziak pakhat "Pathian hnen thlenna kawng" tih a ziak chuan ka thinlung a khawih em em a, chu a ziahna lehkhabu chu lei dil turin an inah ka leng a, naupang te mah ni ila phur tak leh lawm tak maiin minlo chhawnchhaihin min lo pe a. Ziahchhawn phalna pawh min pe nghe nghe a ni. Hun lo taka chatuan ram min lo pansan ta hi a ui ber te zing ami ka nih ka inring.
Kraws tih awmzia felfai deuhva website-a ziah a awm chuan link min rawn pe thei angem?
Post a Comment