RAM CHU LALPA TA A NI - Rev. C. Chawngliana

Bible : Sam 22 : 28

Kan rama chanchin tha a lo luh atangin kum za chuang a ni ta a. Thil ropui tak min tihsak a, min chawisangtu kan Pathian chu chu fakin awm rawh se. Hnam tin tan Pathianin an awmna tur ramri a siamsak theuh a ni tih kan Pathian thu-ah kan hmu a. Mizote tan pawh Mizoram hi kan chenna turin min ruatsak a ni tih kan pawm thei em aw? I han ngaihtuah teh ang u. Mi tam tak chuan phai zawl zau pui pui, leilet tha tak takte an han hmuh hian Pathianin ram tha bik leh duhawm bik a pe niin an hre thin a. Keini tlang ram chhengchhe taka kan awm hi an hrethiam thin lo a ni. Amaherawhchu kan Pathian hian tum neiin he ram hi min pe a ni tih kan ngaihtuah ngai em? Khati khawpa hnam mawl ni si kha a hnam atan min thlang a, khawvel tieng turin min din a duh a ni. Engtin nge Mizo hnam hi a him theih ang? tih Pathianin fel takin rem a ruat a, min ngaihsak a ni tih hi kan ngaihtuah a ngai a ni.

Kan unau, kan tlangmipui te phaizawl ram tha thleng thla hmasaho hi an aia fing zawk leh tam zawk hnam dangin an lo chin ral ta a, vawiinah hi chuan hnam khawngaihthlak tak, mahnia ding chhuak thei tawh lo dinhmunah an lo ding ta hial mai. Keini hi khatih hunlai khan an aia mawl zawk leh chak lo zawk kan la ni a. Chuti chung chuan phai ramah hian lo tla thla ta ila anni ai hian kan ral nasa dawn. Vawiina Mizo hnam ropui taka lo ding chhuak ta leh Pathianin khawvel tieng tura kohhran ropui tak min lo dinsak hi hmuh tur a awm lo mai thei a ni. Chuvang chuan hnam dangte luh theih lohna tlangram chhengchhia leh ei leh barte pawh thar theih mang lohna tur hmunah hian kan hnam hi Pathianin min thukru a, he ram hi kan hnam chenna atan min lo pe a ni.

Pathianin he ram min pek chhan chu a chhungah hian a duhzawng ang taka a hnam thlante kan chen a, a thu chu kan hnam nun inphuar khawmna a lo nih a, chumi atanga rah tam tak chhuak a, khawvel tieng tura feh chhuah hi ram min pek chhan leh hnam min din chhan chu a ni ta a ni. Chutiang tak ti tur chuan kan hnam hian ke a pen em tih erawh kan ngaihtuah a ngai viau a ni. Kohhran hrang hrangten missionary tam tak thawn chhuakin hna thawk mah ila, kan nunah kan inenfiahna tur thil tam tak chu a awm a ni. Kohhran pawl hrang hrangte hian kan pawl hrang rilru hi eng emaw chen chu kan pawl invawn nun nan leh kan kohhran tih chaknan kan kalpui a ngaih chin chu a awm ngei mai. Amaherawhchu Pathianin hnam khat, chhungkhat atana min koh kan nih avangin kan pawl hranna rilru hi kan lak len lutuk chuan Pathian min koh chhan hi kan ti hlawhtling thei lo ang. Pawl hranna rilru paih a, Lalpan min kohna chhan zawk Pathian ram tizau tura inpumkhat zawka hna kan thawh hian Pathian duhzawng chu kan ramah hian tih puitlinin a lo awm chauh dawn a ni.

Rinawmna thu-ah hian kan inen fiah a ngai ta a ni. Hmanah chuan kan pi leh pute khan kawng an khar a, thingfakin kawng an do mai a, tumah an lut ngai lo. Nimahsela tunah chuan tala lianpui pui, pakhat mai ni lo pahnih pathuma kan kalh pawhin kan him zo ta lo. Thin thi-in mi tam tak kan mu thei lo a, kan ralmuang lo tlat a ni. Kristian-na kum za chuang kan hman mek laia kan hnam nuna rinawmna lo tlu chhe mek hi a pawi hle a ni. Chuvangin kohhran tinte hian rinawmna hi inzirtir thar leh ang u.

Ruihlo-in kan thalai tam takte a tibuai a, nunna chân pawh an tam ta hle. Tin, mipat hmeichhiatna thu-ah pawh kan hnam hi kan hming a hliau ta hle mai. Hemi kawnga inthlahdah leh Pathian ngaihsakna nei loa nuam chenho reng reng hi a tawpah chuan hnam tlu chhia an lo ni fo thin.

Ka sawi leh duh chu zuk leh hmuah thu hi a ni.Kan ram hi India ramah mipui cheng zat atanga chhuta zuk leh hmuama insum lo ber kan ni. Zir miten an han zawt kual a, sim tum, sim duh percent chu a hniam em em mai a ni. Nu leh pa mai ni lo, naupang zawkte thlenga zuk leh hmuam kan buaipui ta hi a pawi hle a ni. Hnam dang an lo kal a, Mizote chu Kristian an ni a, kohhran ropui tak a ding a ni, kohhran chak tak a ding a ni tia kan chanchin zir tura lo kalte hian engatinge heti tak maia zuk leh hmuam in uar, an ti thin. Chhan a har, sawi tur kan nei thin lo. Hnam dangten min han hmuh hian Lal Isua hmel an hmu thei lo a, ringlo mite tihawm nia an ngaih avangin Lal Isua hmel hi an chhiar thei thin lo a ni. Chuvangin kan thil tih leh chin lai mekte hi i ngaihtuah chiang ang u. Sim turin kan thinlung pawh i buatsaih ang u.

Engtin nge kan tih tak ang le? A insiam tha hmasa tur chu sorkar ni lo-in kohhranho hi kan ni. Pathianin Israelte a chhungkua atan a thlang a, mahse amah an theihnghilh thin avangin nasa takin a hrem thin a ni tih kan hria. Keini pawh Pathianin he ram hi min pe a, ram chu LALPA ta a ni. Kan chenna atana min pek, kan chen hawhna a ni. A chhungah hian him taka kan chen reng theihna tur chuan he ram min petu leh hnama min tungdingtu tana rinawma kan awm hian kan hnam hi chu a dam ang a, tundinin kan awm zel ang. Amaherawhchu Israel-te anga kan inthlah dul rawh chuan chhiatna hi kan bak a ni. Kan rama sualna lo pung mek leh min chim veltu hrang hrang han ngaihtuah hian kohhranhote hi ngawih a hun tawh lo a, aw kan chhuah a hun a, hna kan thawh a hun a, tan kan lak a hun a ni. Kan rama sualna chi hrang hrang rawn lut te hi hnawtchhuak leh hneh tura Pathian ralthuam famkima inthuam chunga ke kan pen hi a va tul ta em.

Kan ram sorkar pawh hian theihtawpin hma a la thin a, sorkar hmasa leh tuna ding lai pawhin theihtawp an chhuah thin. Nimahsela sorkar chakna leh sum leh pai hausakna atang hi chuan hneh theih a ni lo a, setana hmanrua mai a ni leh zawk thin. Chuvangin, chung zawng zawng chu a kal dik theihna tur leh sorkarin a hmalakna te, hmanrua a rawn chhawp zawng zawngte hi hmanraw tling leh tangkaia hman a nih theihna turin Pathian kohhranhote hian tawngtaina nen kan lo thawhpui a, tan kan lo lak ve hi kan tih tur chu a ni. Chu chuan sorkar hmalakna hi a tipuitling thei dawn chauh a ni. Hetih lai hian sorkar hmalakna lamah pawh a nih tur ang ni lo, a hmanna tura hman loh, ram changkanna tura buatsaih ni si changkanna tur atana hman theih tak loh thil tam tak hi a awm a ni.

Heng thil zawng zawng hi kan tih reh a, Pathianin he rama min din chhan ang ngeia kan awm a nih phawt chuan khawvelin he ram hi a thlir ang a, khawvel tieng turin min buatsaih dawn a ni. Heng zawng zawngah hian Kohhranhote hian mawhphurhna kan nei a ni tih i hria ang u. Pathianin a hnam atana a kohte kan ni, a chhungkua atana a thlante kan ni, intih hranna rilrute hian kan hnathawh tur tam takte min tibuai a, chuvang chuan inpumkhatna rilru pu turin inbuatsaih thar ang u. Kohhranho te hi kan tih tur dik tak, khawvel tieng tur leh Mizoram siam tha tura tangkaia kan din theihna turin a mawhphurtu lian ber kan ni. Ram chu LALPA ta a ni, Lalpan a thu malsawm rawh se.

Khuang hnih Vs Solfa vs Rock Vs Modern Music


1. Hla nalh sak chang chuan zai pawh a nuam : Kan hla duh em em kan sak chang hi chuan nawn pawh hi kan chak ve thin.Chuti a nih chuan zai tui vak lova kan ngaihte pawh hian hla duhzawng an nei theuh tihna a ni dawn a, an hlasak duh zawng kan ngaihtuah sak dawn tinna emni ni ang?

2. Pathian thlarau changtute chuan enghla pawh tui takin an sa thin : A dikna chen a awm, mahse Kan mihlim tak tak biak in tuala lam thinte hian sap hovin Pathian fak nana an hman thin Rap leh Heavy Metal hla te hi han sukpui dawn ta se an ti thei ang em?An thei lo chiang khawp ang,mahse Pathian thlarau changtute tho an ni a!!

3. Nuam kan tih danin Pathian kan fak : Nuam kan tih dan chauvin Pathian kan fak a ni mai lawng maw?Khuang hnih hi ka tui hlawl lo,beginer kan nih lai khan khuang hnih hlain min zaipui ta char char se tunah pawh zai nuam ka ti khawp ang.Khuang hnih hlaa ka zai tui loh avangin thlarauvah ka awm lo tihna emni ni ang?Nih leh Rock music leh Rap hlaa an lam loh avang khan mihlim ho kha thlarauvah an awmlo tihna emni ni ang?

4. Kan ril rem zawng : Petra lammualah an rawn kal a,thalai tamtak kan pungkhawm. Kha mi tuma kan han lam nasat zia leh kan sapatal nasat zia kha..!!!Lam nasa sawi dawn chuan mihlim ho hlim lutuk tawnghriatloha an zawm ai mahin kan lam nasa a,kan zuang nasa zawk si a.Biak inah pawh hla thothang tha deuh leh sak nuam deuh kan sak chang chuan kan hriat loh laiin kan lo bu ve tlauh tlauh thin.

5. Diverse Generation : Sap tawng ten kan dah ve a,nia .. a nihna takah chuan Mizote hi Generation hrang hranga danglam kan ni a,kan duhzawng leh hla ngainat zawng pawh a inang lo hle.Kan nu leh paten khuang hnih hla an duh a, an ni aia kum 10 vela naupang ten Sofa hla,Hym kan tih ang kha an ngaina a,chutiang zelin keini generation hian Rock leh Classic Rock kan ngaina, keini aia la naupang zawkte chuan Punk, R&B, hiphop etc, an ngaina bawk a.Kan music ngainat zawng hi a danglam nasa lutuk. Hei hian Kohhran anga a huhova zai tui lohna a thleng niin ka hria.

Khuang hnih hlaa zai tuilote kha thlarau lo leh Pathian fak chak lova kan puh vek dawn chuan a dik lovang,kan lamna leh kan buk pui suau suauna Pathian hlate hi an bukpui theih ve loh chuan keini atang pawhin thlarauva awm lo leh Pathian fak chak lo an ni ve thei tho. A tawp berah chuan Kristian tu pawhin Pathain fak an chak a,kan hla duh zawng leh mahni taksa milpuiin kan fak ni maiah ka ngai.Hei hi Kohhran hian a hriat thiam em em hunah chuan tun ai hian inkhawm kan tha anga, kan pung tual tual ang.

Lehkha Pawimawh

Dawrpui Kohhran atang a Dawrpui Vengthar Kohhran a indan hlim a lehkha ziak pakhat, Kum 1958 a mi a ni awm e. Click la,chhiar rawh le...

Biak In Pahnihna


Mi an lo pun zel avangin Biak In chu a tawt tan ve leh ta mai a.Kohhran Committee rawt angin May ni 28,1961-ah a sak dan tur Kohhran vantlang inkhawmin an rel a;a bathlar zauh an rel a.chumi hnuah chuan Kohhran Committee duh angin an sawi nawn leh a.

Biak In ding lai sakhnan a,a lian zawk a sak chu an rel thlu thei ta a ni.Thawhlawm pawh khawn nghal a ni a.Thalai Pawlin Rs 860/- an ngah a.Kohhran Hmeichhiain Rs 265/- an tlin bawk a.Kohhran mipui thawh khawm nen,Biak In a dung Ft 55,a vang Ft 34-a zau chu an sa tan thei ta a.A Bangbul (Scirting) atan Lawirawhchan (Brick) an rem a;a bang Hratvunchar (Tile),a ban ngiau puichang,a chung Rangva chhah chi hman a ni.Theihtawp tak meuhvin tan an la a,April ni 5,1965-ah Inkhawm nan an hmang tan leh thei ta a ni.

Biak In sak hmang hi-a dung,a vang leh a san zawng,a chung chhawngah a sir tluan tawnin darthlalang bel vek leh ventilation te,kawt lamah varandah inte tlema chei leh,dithlifarfem thing zai kaka bel tluanchhuah inchawih tak mai bakah kawngkapui pahnih inkarah lian tawk takin darthlalang rawng hrang hrang a belkhawm hlam bial zet tura zau awm chuan mit a la in a tih mawi phah hle a ; Biak In sathar tur te hian an rawn en ve fo thin a ni.He Biak In ah hian zai a nuam em em mai a,Aw,a thangkhawk ve lova; zaipawl hla rem hi a mawi zual bik emaw tih mai tur a ni.

pic1(1980 leh 1990 chhova Ktp hruaitu te.) Pic2 (Biakin 2-na kawt ah kohhran Hmeichhia te)



Biak In Vestry : Biak In hmar lam hi thenawm ram chin deuh maiah sak a nih avangin hmun awl a awm lova.Thlanglamah te tak tein thawhlawm thawhlawm chhiarna tur Inte uluk taka siam a ni a;Kum sawm dawn lai hnuah chuan Sakrament buatsaihna hmun pawh awmlo chu Vestry pangngai ve deuh sak rel a ni a.Biak In char lam ah Pu K.Remsiama ram bawk chu dil a ni a,ani chuan tlawmngai takin Kohhran mamawh zat chu a lo leitir leh thei ta mai a,an lawm em em a ni.Upa Sangkhuma(Thing mistiri) Lungdai khua chu ruaiin,Biak In vang lam tia in a chung chhip atangin chhunkuna uluk takin Biak In timawi zawk mah a sak a ni ta a.Kum 1974-ah luah theih a sak zawh a ni.

Biak In Hungna: Biak In chhak lamah hungna siam a ni a.Hei hi ramri laiah pawh ni chuang lovin a rem lai ah lunglum dan nan leh tuihawk hruai ngilna atan siam a ni a.Kawt lamah Kum 1971 ah Rs 368/- chawiin Gate thir/-a siam a ni a.Thlang lamah pawh chhuah thlakna uluk tak step siam in Gate Rs 475/-seng in siam leh a ni a,Biak In hungna pal leirawhchan (Brick)a pin te nen May 15,1980 ah zawh a ni hlawm a,Biak In ramri hi Sawrkarin phalna(pass)lehkha (order No 65 of 1976,memo No.DCL/GW-10/76/3433-8 of 14.6.1976)siam thlap a ni.

Biak In-a Electric Lakluh : Pathian Biak inkhawmnaah Petromax zan ah chhit thin a ni a.Aizawl khawpuiah sawrkarin electric a lak luh veleh Dawrpui Vengthar Kohhran chuan mahni ina lakluh ngaihtuah hmasa lovin Kohhran Committtee remruatnain Biak Ina lak luh dan ngaihtuah a ni a.Pu Lalkhawhluna leh a thenawm pa Pu Lalchhunga SDO PWD-te chu Electric Department Office-ah hotute bia in an leng a.Pathian Biak In tan anih avangin remchang lo siam theih an tum thu an lo hrilh ta a.An lawm hle mai a.Electric lakluhna tur sum tuak nan lehkha ip siamin kohhran chhungkaw in tinah an sem ta a,Kohhran hovin an thawh theih angte Ip chhung ah khungin inkhawm pahin Biak In ah an keng khawm a ni. An thawhlawm Ip te chu November ni 7,1971 ah an hawng a,A vaiin Rs 408/-a ni.Kohhran Tualchhung sum atanga tihbelhin Electric hrui zamna man leh thil tul dang atan Rs 536/-hman a ni a,Electric line Connection atan Sawrkar-a dah luh Rs 345/- niin, Senso zawng zawng Rs 881/- a ni .December Ni 7,1971 ah Biak In ah Electric eng chhit tan a ni a. Aizawl tlak lamah Electric eng chhi hmasa ber niawmin an inhre bawk a ni.

Biak In 2-na

Biak In Pakhatna

Kan Biak In hmun hi Pu K. Remsiama leh Pu Ramliana(Bawrhsap Office clark i/c Transport) te chuan ‘Biak In hmun atan a remchang mai awm mang e’ti in, Kum 1955 khan Pu Satinkhenga ‘L’ leh a thian pahnih te chu an samfai tir a,A tirah chuan Taitan(Kangthai),Hel leh Thakpui hmun,Sih awmna anga hmun hnawng reng mai a ni.

Chutia an han sam fai takah chuan,Pu Khawpuia,Pu Lamthanga te leh midang te chuan an ngaihsak ta hlawm a.Thenfai leh laih zawl hnatlang an nei zui a,Pu Ramliana chuan an Office a mi (Petromax) khawnvar a rawn hawh a;zan ah te an thawk zui a,thla en zan te pawhin an bei a,August ni 1,1955 ah chuan Pu Lamthanga’n a vawk a thawh a,nileng hnatlang an nei a,an thawk nasa em em a ni.A ram chu a zim deuh avangin Pu Remsiama chuan ama ram a sahthlak tak bawk avangin an phur zual a,Kum a han tawp meuh chuan an lai zo vet a mai a ni.

Kum 1956 ah Dawrpui Kohhran atangin Dawrpui Vengthar Kohhran a indang a,Kohhran hruaitu tur te a ruatsak nghal a,chung an mi ruat te chuan,Kohhran indanna sum thehchhuah tur leh Biak In sak phalsak turin Dawrpui Kohhran ah an thlen a ni.Hruaitu tur a ruatsak te chuan Biak In sakna tur thawhlawm te an khawnzui a,Thawhlawm lut hmasa ber chu Pu Rongura te nupa in Rs 50/- an thawh a,Midang thawh nen avaiin Rs 1,402,.13/-(Rs Sangkhat zali pahnih leh anna sawmpathum) a ni a,Hei hian Biak in dung feet 31,a vang feet 20 a lian an sa thei tan ta a ni.ungrual takin tha leh sum thawh zui zelin a chung khuh theihin an peih ta a.Thawhlawm a awmthei ta silo,harsatna an tawkin an mangang ta hle mai a,Mahse,Pu Khawpuia’n tlawmngai neitu chan changin Biak In chung chu Rs 1200/- chawiin a khuh ta a,an sak tan kum vek ah luah theihin an peih ta a ni.

Thawh tur la tam mahse, an hah tawh avangin kum khat(1957) chhung an chawl a,Kum 1958 january leh February chhung, in tinah Biak In sakna thawhlawm an khawn a,Thla thar chawlhni hmasa ber zan apiangin Biak In sakna thawhlawm khawn thin a ni bawk a,Thla hnih a lo liam chuan Rs 171.80/- an hmu a ,an lawm hle a ni.An thawhlawm tlingkhawm chuan Biak In chhung leh pawn lam la zawh felloh te an thawm tha a,Khawnvar khaina te,khuang dahna tur te,Lehkha tarna te,Pulpit kharna te, an siam a,Laltin an lei bawk a, Kum 1960 a lo nih meuh chuan an sa zo ta a,hlim takin an luah thei ta a ni.


(pic1)-Biak In Pakhatna-a Innei hmasa te, Inneih inkhawm thlalak,(Pic2) Biak In a Innei hmasa ber te



Eng Music nge kan ngaihthlak ang?


Ringtu thalai tam takte rilruah heihi zawhna lian tak a ni thin. Khawvel lam hla (secular music) hi ngaihthlak a nuam a, a nalh vawng vawng a, a thlukin lung a kuai a, min hneh em em thin a ni. Tin, khawvel hla satute hian mi hneh theihna an nei tam bik a, musicians leh a zaitute chet zia hrim hrim pawh hi a mawi thlawtin mi tam tak min hruai thei thin. Chung khawvel lam hlate chu kan ngaithla dawn nge dawn lo, duhthlanna kan siam dawnin hengte hi teh fungah hmang ila,

1) Music-in a tum ber.
2) Music Style
3) A hla thu.

1) Music-in a tum ber : Music hi Pathian hnen atanga chhuak a ni a, Pathian chuan a mah fak leh chawimawi nan chauh a ti nge ? Mihringte hahdam nante, Hlimhlawp thil leh khawvel lam hla sak nan pawh a ti ... Bible-a rimawi tum thiam em em leh rimawi tum hmasa kan hmuh pakhat chu Lal Davida a ni. Lal Davida khan rimawi kha eng atan nge a hman ? Pathian fak leh chawimawi nan a hmang thin a ni tih Sam 4:1; 6:1; 54, 55; 61:1; 67:1; 76:1 -ah te kan hmu. Chutihlaiin, Thlarau sualin a tihbuai Lal Saula khan a buai changin a hahdam theih nan Davida kha rimawi tum turin a ko thin tih pawh kan hmu tel bawk. Tin, Israel fate khan music hi hlauhawm a lo awm a in kohkhawm nan an lo hmang thin tih pawh Nehemia 4:20-ah kan hmu a hetiangin " Tawtawrawt ri in hriatna lam apiangah chuan chutah chuan kan hnenah lo tlan khawm ula; kan Pathianin min do sak ang,". Hmelmate tihthaih nan pawh Gideona leh a hote khan an hmang a ni tih Roreltute 7:16-22 ah kan hmu bawk. Thuthlungthara tirhkoh ropui Paula ringtute hnenaah, " Fakna hlate, Pathian hlate, thlarau lam hlatea inbe tawnin, Lalpa chu in thinlungah hla sak sakin, tingtang kaihsak rawh u", tiin a fuih a. Heng atangte hian music chu Pathian fak leh chawimawi nana hman ber a ni tih kan hmu a, Tin, ringtute'n thil dang atan pawh an hmang tho a ni tih kan hmu bawk.

2) Music Style : Mi chi hrang hrang kan nih avangin kan duhzawng a in anglo nuk mai. A then chuan music instruments tel miah lo zaipawl an duh a, a then chuan Kristian hla bu ami chauh ngaina an awm a, a thenin Rock lam an ngainat em em laiin a then chuan kristian Hymns kan tih chauh nalh ti an awm bawk. Pawi ta em em chu thenkhat mahni music duh zawng chauh hi bible-in a pawm nia hria a, music dang hnualsuat a, Setanic music lama puh tlat an awm thin hi. "Engkim thawthei tawh phawt chuan Lalpa chu fak rawh se, Lalpa chu fak rawh u ", a tih ang khan engkim, thil engkim... ri chhuah thei tawh zawng zawng, thil nung leh nunglo thlengin Pathian fak tur kan lo ni. Bible chuan Rock music hi Pathian faknan hnawl a ni a, hla muang deuh lam chi chauh hi Pathian fak nan hman tur a ni a ti reng reng lo. Sam 68:25;150; Ezra 3:10 -ah khan Pathian fak nana musical instruments an hman leh Lalpa fak nana an tihte kan hmu a. Sam 150 ah khan khang hun laia musical instruments an neih zawng zawng a rawn ziah chhuak niin a lang, chuti a nih chuan Lal Davida khan kum 2000AD hnulam hian sam number 150na kha han ziak leh se, Drum set, electric guitar, bass guitar etc, a telh vek a rinawm. tunlaiah chuan hnam hrang hrang kan music ngainat dan zelin Pathian fak dan leh chawimawi dan hi a dang ta niin a ngaih theih.

3) A hla thu : Music in a tum leh a style atang ringawt chuan ringtute tan ngaihthlak tur thliar hran a har ta. Pawimawh ber nita chu a hla thu hi a ni. Philippi 4:8 hi innghah nan hmang ta ila "A tawp berah chuan unaute u, a dik apiangte, a zahawm apiangte, a fel apiangte, a thianghlim apiangte, a duhawm apiangte, a thangmawi apiangte- thatna reng a awm a, fakna reng a awm phawt chuan - chungchu ngaihtuah rawh u." Music kan ngaihthlak reng rengin he Bible chang hi ngaihtuah thin ila, khawvel lam hla (lengzem leh lenglawng) kha adik a, a zahawm a, a thianghlim a, thatna reng a awm a, fakna reng a awm phawt chuan ringtute tan ngaihthlak a pawi lo.

Khawvel lam hla (secular music) kan hriat tam takte hi chu Philippi 4:8 nena in letling thawkte an ni, tharum thawhna, mipat hmeichhiatna hman khawloh leh in huatna te min zirtir a, Pathian ropuina sawichhe zawng leh remna leh muanna do tlat, Lal Isua zirtirna kalh zawng hlate chu ringtute chuan kan ngaithla tur a ni lo. Chutihlaiin secular music tam tak, a hla thua Pathian hming lang kher lo, mahse thianghlimna te, inhmangaihna te leh inunaunate rawn tar lang a awm bawk. Tin, love song tamtakin inhmangaihna thianghlim leh thianghlim taka nupui pasal neih lamte an rawn tarlang bawk. heng hlaahte hian Pathian hming langlo mahse ringtute tan ngaihthlak a pawilo.

Chutihrualin kan hriat reng tur chu rilrua khatliam kain a sawi chhuak kan tih ang khan kan thinlung luahtu thil chu kan ka leh kan chet ziain kan puang chhuak ngei ngei. Heihi a nih avangin Kolossa 3:2, 5; ah chuan "Chung lama thil awmah te chuan in rilru nghat tlat rawh u, leia awmahte chuan nghat lovin........... Chutichuan in taksa peng leia awmte hi tihlum rawh u, inngaihnate, bawlhhlawhnate, hurnate, chakna sualte, duhamnate hi( duhamna chu milem biakna a ni si a)". II Korinth 10:5 a kan hmuh angin 'hnialnate leh thil sang tinreng Pathian hriatna dal tura sang taka siamte chu thiatin, ngaihtuahna tinreng Krista thu awihna salah kan hruai zawk tur a ni'.

A tawp berah chuan ringtute tana music ngaihthlak tur tha ber chu Pathian hla kan tih mai, fakna leh Pathian ropuina puangchhuak hla hi ni lo thei lo. Kristian musicians thiam tak tak an tam thlawt, eng music style/genre(rock, rap, raggae, classical music,pop, etc..) pawh ngaithla duh la, gospel music ah hian a kim vek a ni. A hla thu atangin kan ngaihthlak tur kan thliar tur a ni. "Thil engpawh Pathian kan hnaihna kawnga min daltu tawh phawt chu sual a ni".

Blood donation


Vawiin Dt 6.7.2011(Nilaini) hian Dawrpui Vengthar Branch Ktp te'n,Damlo harsa zawk leh thisen mamawh te tan Presbyterian Hospital Durtlang hnen ah Thisen kan pe a,Member (mipa 41 leh Hmeichhia 4) 45 in Thisen kan pe thei a ni.

Dawrpui Vengthar Ktp te hian tunhma deuh atang khan Damlo Thisen mamawh tan hian a khat tawkin Thisen kan lo pe fo thin a,Kum kalta (2009-2010) vel ah pawh khan Thisen pe tha lawmman a lo dawng ve hial tawh a ni.He Rawngbawlna hi member ten kan hlimpui thin bawk a, zawngchhang tlak kan ti hle thin a ni.

(click2enlarge)

I film chan chu en tawh ila


Tik tok, tik tok, tik tok, tik tok… Tik tok tih i chhiar ringawt pawh hian second hnih chu a kal liam leh reng tawh. Hemi sentence i chhiar zawh phei chuan second sawm dawn lai a liam hman ta! Nichin kha a liam mai a, nizan kha a liam thuai a, kar hmasa pawh kha a liam ta vung vung bawk a.Hun hi hmalam panin a kal bung bung a, a hawikir ngai lo. Tin, a ding ngai bawk hek lo.

Kan thil tih apiang hi DVD writer-a thil kan disc kan burn ang hian a in record zel a, lo burn sual pawh ni ila, tih that leh theih a ni tawh lo, a sual ang ang khan a in write zel a. Kan thil tih apaing chu atha emaw a thalo emaw, engkim, a zawng zawngin Disc lianpuiah a in save ta zel a. Eng percent chiah nge kal tawh ? Write zawh nan eng zat percent nge la awm tih tuman kan hre bawk si lo.

Theory chuan hun kaltawh (Past) -ah kal let theih mahse reality chuan thil theih a ni si lo. Chuvang chuan kan hun kaltawhte kha thiamna chi hrang hrang rawn mah ila, kan edit tha thei tawh lo. Video file kan export ang mai hian kan nun hi Disc lianpuiah chuan a in Render tluk tluk a ni.

Heti a nih chuan mimal tin hian mahni chanchin film chu kan shoot mek reng tihna a ni a. A nih leh tunah tak hian eng scene nge kan shoot mek ? Mipat hmeichhiatna hmankhawloh Scene em ni ? Nge Sum diklo taka lak lai Scene ?…. Nimin khan eng scene nge i shoot ? Vawiin hian eng scene nge i shoot dawn ? Cut a awm dawn lo, retake a awm dawn bawk hek lo. Vawikhat i shoot kha final a ni nghal zel a nia. Edit miah lovin.. raw files kha i submit a ngai dawn tih hre reng rawh.

Tichuan Pathian in ” I hun a thleng ta e”, a rawn tih hunah i film chan chu i thehlut dawn a, tichuan, mi zawng zawng hmuhin i film chan chu tlangzar a ni ang, kan la en ho vek dawn. E hiau..!! chuti a nih chuan nula ka lo khawsak pui dante, a ruka ruihhlo ka lo tih te, tual ka thah laite leh ka eiruk laite kha a hohovin kan en dawn tihna a ni maw…. ni chiang e. Lalpa leh.. a va han zahthlak dawn haih haih ve le. Ka chang thui tawh khawp si a !!!!!

Tupawhin eng scene nge kan chan hlawm kan chu kan hre kiau ang chu. A huhova en atan chuan zahthlak tak tak a awm chiang hlawm ti rawh u, kan edit thei tawh si lova !!! A va han manganthlakin a va han zahthlak dawn tak em !!

Mahse..Heyy…. Good News a awm a nia….

CENSOR BOARD an awm hlauh a nih chu. Tute nge chumite chu in ti maithei.. Member chu pakhat chauh a nia, chu chu Lal Isua a nia. Scene thenkhat a huhova en chiloh i neihte kha Lal Isua i rin chuan a Censored sak ang che. “A va han lawmawm em em ve le, Lal Isua chu rinve tur a nih chu”. Mahse thil pakhat leh chiah… ka ring ti engang mahla, a duhzawng i tih ngai loh a, a lungawina i siam sak loh chuan a censored loh sak palh ang che tih chu a hlauhawm khawp mai.