Kan Kohhran Secretary Upa NG.Lalhmingthanga chu Ni 18 zet mai nikhaw hrelova a awm hnu ah 17th nov.2010(4:34AM) khan a Rawngbawlsak a LALPA hnenah a chawl ta.
A CHANCHIN TLANGPUI
Pian Leh Murna : Upa Ng. Lalhmingthanga hiCompounder Lalruma Ngente (L) leh Saichhungi Pachuau fate pali zinga a tlum ber niin December ni 18, 1941 khan Pukpui khuaah a lo piang a.
A Unaute -
1) Lalthansanga(L)
2) Lalneihthangi w/o Upa Lalkhawhluna,
Dawrpui Vengthar
3) Lalhmingliani w/o Upa Chalrobuanga, Pukpui
Kum May ni 28, 1968-ah Zodingliani Khawlhring d/o Upa Laikunga Khawlhring, Serkawn nen inneiin fanu pakhat, Christina Lalchhanhimi (w/o Vanlalruata Pachuau) an nei a. A tu duhawm tak tak pali te chu -
1. Lalawmpuii, (Awmawmi) kum 11
2. Lalchhuansanga, kum 4
3. Lalhruaisangi, kum 3
4. Lalremsanga, Thla 9
Zirna : Kum 1949-ah Pukpuiah Nursery ‘A’ pawl a zir a, kum 1961-ah Lunglei High School atangin Matric Second Division-ah pass-in, hemi hnu hian Imphal-ah Adinjati Technical Institution-ah lutin kum 1961- 64-ah Diploma-in-Engineer (Civil) tha takin a zo a ni.
Eizawnna : December ni 19, 1964 khan SubordinateEngineer, Lunglei Divsion, PWD-ah hna a thawk nghal a. Kum 1973-ah Sub-Divisional Officer-ah kaisangin, Sairang Sub-Division a enkawl a ni. Kum 1975 khan PHE Department-ah lutin Technical Division, Aizawlah a awm a. February ni 19, 1988-ah Executive Engineer-ah a kaisang leh a, April ni 1, 2002 khan pension-in a chawlta a ni.
Khawtlang Rawngbawlna
YMA : Khawtlang rawngbawlna lamah theih tawkin a inhmang thin a, YMA, Dawrpui Vengtharah nihna leh chanvo chelh tawhte -
1) Executive Member : Kum 1985, 1993
2) President : 1986, 1988
3) Senior Adviser : 1995-2000
Sport : Executive Engineer a nih lai atang hian a fanu hming chawiin - Machhani Club, 1985 khan a din a. Volleyball player tha tak tak lakhawmin competition-ah vawi tam tak an champion tawh a. Mizoram pum huapah tum 26-ah Final lutin vawi 21an champion a ni. Mizoram Volleyball Association-ah President leh Vice President a ni tawh a. Volleyball a promote that avangin September ni 16, 1995 khan World Volleyball Centenial Award, ‘Centenary Award for Meritorious Service for the Promotion of Volleyball’ chu India rama Association paruk an pek rualin President, Volleyball Federation of India-in Madras-ah a hlan a ni. Mizoram Basketball Association-ah President a ni tawh bawk a, Tunah hian Dawrpui Vengthar Sporting Club Senior Adviser a ni mek bawk.
Rawngbawlna Lam : Kum 1963 khan Imphal-a lehkha a zir laiin Krista chhandamna a chang a. A zirpuite atanga hriat danin Pianthar Harhna-in Imphal pawh a thleng a, Adinjati Technical Institute zirlaite pawhin chang vein Imphal Mizo Kohhran lamah pawh nasa takin hmasawnna a thlen niin an sawi. Pathian rawngbawl tul tihna a rilruah a lian hle thin. Mahse, a chhungte’n pawisa tam tak senga lehkha an zirtir chu tihthlawn chi niin a hre si lova rilru pangkhing takin sawrkar hna chu a zawm ve ta a ni. Sawrkar hna a thawh avangin Pathian leh kohhran tan a tangkai lo em em niin a inhria a. Rinna lamah chak lo tak ni mahse, Kristaa chhandamna chu a tan chakna a ni tih hi a hria a. A chak loh em em lai pawhin Kristaa piangthar a ni tih hi a inhre reng thin.
Dawrpui Vengthar Kohhrana a awm hma chuan Saron Veng Kohhranah Sunday School naupang leh puitlingah zirtirtu a ni ve thin a, Nilai leh Inrinni zan thusawi rawngbawlna pawh a nei ve hman tawh a ni. Mizoram hmun hrang hranga a insawnna apiangah kohhranin rawngbawl hna an ruatsakah theihtawpin a thawk thin. Dawrpui Vengthara a awm hnu hian puitling leh naupang Sunday School zirtirtuah te, Nilai leh Inrinni zan rawngbawltu te a ni chho a. Building Committee-ah te telin, theih ang tawkin phur takin a thawk ve thin. Sawrkar hna a chawlhsan hnu chuan a tan rawngbawlna zau zawk a inhawng ta a, a phurzawng leh tuizawng a nih avangin nuam ti takin rawng a bawl thin. A hmaa tih tur awm chu rilru leh tihtakzetin hlenchhuah a tum thin a, pakhatna kan ni tur a ni ti tlat mi a ni.
Kum 2006 khan Dawrpui Vengthar Kohhran Committee member atan thlan tlin a ni a. Hemi kum vek hian Kohhran Upa atan thlan a ni leh a. October ni 4, 2007 khan Aizawl West Presbytery, Chawnpui Kohhrana neihah Moderator Upa C. Makliana’n Dawrpui Vengthar Kohhran Upa atan a nemnghet a ni.
Rawngbawlna A Chelh Te
A awmna Kohhranah :
1) Kohhran Secretary 2) Kohhran Finance Committee Secretary 3) Kohhran Sunday School Committee Member 4) Puitling Sunday School Zitirtu 5) Kohhran Ramthar Committee Member 6) Kohhran Masihi Sangati Committee Chairman 7) Kohhran Building Committee Member 9) Thuhriltu - Sunday Chhun leh Zan Inkhawmah.
b) Pastor Bialah :1) Bial Standing Committee Member 2010-2011 2) 2010 Synod Palaia ruat 3) Senior Auditor (April 2009 - March 2010), Bial sum; Bial Kohhran Hmeichhe sum; Bial Masihi Sangati sum; Bial KTP sum 4) Bial Masihi Sangati Committee Member
Rawngbawlna Peng Dang
Gideon International Aizawl Camp-ah hian Church Ministry Chairman a ni mek a, Bible semin hmun hrang hrangah a chhuak thin. Aizawl khawpui chhunga School leh College-ah vawi 200 chuang Bible semin a chhuak tawh. Tin, Aizawla Presbyterian Kohhran 109 chuangah Bible semin a chhuak thin a (vawi hnih vawi thum kal nawnna pawh a nei). Baptist Kohhranah vawi 25 zet Bible semin a chhuak tawh bawk. Zoram dung leh vang hi a ma motor leh sum sengin Bible semin a fang chhuak deuh vek tawh a ni.
SET FREE MINISTRY rawngbawlnaah a theih ang tawkin a thawk chhuak thin a. Thlarau Thianghlim Crusade Committee-ah Treasurer hna a chelh mek bawk.ZOFISFED-ah Chairman ni lai a ni a, May, 2002 kh^n USA Business Company Sunrider International (Herbal, Nutrition, Cosmetic etc.) chuan stockist atan an rawn ruat bawk. Tunah hian Up to Date Enterprise, Lower Zarkawtah an nei bawk a ni.
A Nat Dan : Amah hi hrisel tha tak kum 2000 vel atanga BP sang nei tan a ni a, October ni 31, 2010 Pathianni Zan kh^n Kohhran Secretary a nih angin, thu a han puang chu a buai (thisen sang - stroke) tak avangin, tanpui a ngai a a ni tih hriaiin a bul hnaia mite chuan Committee room hluiah an luh pui a, hetah hian nikhawhreloin a awm nghal a, a BP te a lo san em avangin a rang thei ang berin Civil Hospital pan pui a ni a. Doctor-te’n CT Scan an ti nghal a, a thluaka thisen zam chat vangin thisen tling a awm tih hriat a ni a, Casualty-ah dah lutin oxygen te pawh pek nghal a ni a. Laina leh mitlawmngai tam takin a chanchin ngaichangin an tlaivar thin a ni. A tuk November ni 1, 2010 chhun dar 11 AM-ah Intensive Care Unit (ICU) ah dah luh a ni a, karkhat hnu November ni 8-ah CT Scan tih leh a ni a, mahse hetah hian hmasawnna a awm thei ta chuang lo a. Hetianga nikhaw hre lova ni 18 zet a awm hnuah November ni 17, 2010 (4:35AM) a rawngbawlsak LALPA hnenah min chawlhsan ta a ni.
