.: 2009

UPA LH ROHMINGLIANA NITE

Ni 24.8.2009 Thawhtan zan dar 7 pm khan Dawrpui Vengthar KTP ten kan upa ,Upa LH.Rohmingliana Pualin Dawrpui Vengthar Presbyterian Kohhran Centenary Hall ah hun kan buatsaih a,He programme ah hian,Vengchhung zaithiam hrang hrang ten Upa LH Rohmingliana Pathianin Fakna hla a pekte an sa a,Aizawl khaw pawn leh Veng hrang hrang atangin he programme min hlutpuitu te an lo tel a ni.

He Inkhawm hi Dawrpui Vengthar KTP Leader Tv.Dennis Lalhruaitluanga'n Kaihruaiin, mipui lam pawhin chanvo an nei nasa hle a,Upa Rohminga Hla phuah (Lal Isua ka neih phawt chuan ka rethei love,Khawngaihna Rawngbawl hna,Thisen hlu) te,zaithiam te zai kar lakah mipui te zai hona nei in, a hlaphuah pasarih (7)(solo 5 ,Duet 1, kohhran zaipawl 1) te ngaihthlak ni in, Amah Upa Rohminga'n hla pakhat sa in, mipui te min awi bawk a ni.Zaithiam te zai nan leh mipui zaiho nan hian Live Music hman a ni.

A hla satu te leh an hla sak: 1) Tv.Lalfakawma-Zalenna Dar
2)Nl.Lalhmangaihi-I tan ka hlan
3)Tv.C.Lalmuankima(Mka)-Hnehna hla
4)Nl.Zohmangaihi(Tetei)-Sualna simin
5)Nl.Ruthi CVL.Muanpuii-Ka Vahbosan leh tawhlaw'ng
6)Ruthi&Mka(Duet)-Chawlhna nuam Isua
7)Kohhran Zaipawl-Lalpa Nghak rawh

Amah Upa Rohminga'n hla pakhat(1) Lawmthu kan hrilh che Lalpa tih min ngaihthlak tir bawk a ni.

He hun ah hian Kan Branch Finance Secy,PuZohmingliana hnen atangin Upa Rohminga chanchin ngaihthlak ni in,Nl Lalthangpuii,Branch ktp committee member in chawimawina thuziak a hlan a, Upa Rohminga Thusawi leh kalkhawmte zing atangin mi thenkhat thusawi kan ngaithla bawK.

Tetei, Ruthi, Faktea

MKa, Ruthi & Mka , Upa Rohminga
Sini, Musicians & Artiste

UPA LH.ROHMINGLIANA CHANCHIN TLANGPUI

Pian leh murna

Upa LH.Rohmingliana hi May ni 21,1955 khan chhim zote khuaah Thangzuala 'L' leh Dengmawii te fa pathum (3) na ni turin a lo piang a,Unau mipa pali(4) leh hmeichhia pahnih(2) an vaiin paruk(6) an ni a,amah hi chawhte Lianhna hnam a ni.Tunah hian a nu leh a unau te hi Lunglei ah an cheng vek a ni.Zirna lamah chuan Rambuai sawikhawm vel a vangin High school pawh rap mumal lovin a awm a ni.

Chhungkaw lam

Kum 1983 February ni 17 ah khan Dawrpui Vengthar Nula,Lalsawmliani,Pu Pachhunga(L) leh Pi Lalchhingpuii te fanu nen Dawrpui Kohhran Biakin ah Kohhran Dan Thianghlim in an innei a,Fapa pahnih(2) leh fanu pakhat(1) neiin,tunah hian an chhungkua in Dawrpui Vengthar ah an khawsa mek a ni.

Rawngbawlna lam

Kum 1976 July ni 17 Pathianni zan ah,Lal Isua krista chu Lal leh chhandamtu a pawmin Pathian hnen ah a in hlan a.Chutih laia a awmna Zote South Baptist kohhran Ktp-ah leh Sunday school-ah Rawngbawltu a tan lak a ni nghal a,Zaipawl ah Asst conductor atan lak a ni bawk.Tin,Baptist Kohhran a a awm lai hian Rawngbawltu (Tual upa ang deuh hi) a ni hman bawk.Kum 1977 July thla atang khan Upa C,Lalthlamuana(L),Lunglei Lunglawn Team din Evangilistic Team Mizoram ah telin Counsellor,Soloist,Secretary leh Deputy Speaker te ni in,Speaker Thachhangdawltu ber a ni thin a,tunthlengin he team hming hi hmangin Synod Revival Speaker niin Rawng a bawl mek a ni. Kum 1983 khan Dawrpui Vengthar ah an chhungkua in an khawsa a.Dawrpui Vengthar Presbyterian Kohhran ah lawiin Kohhran ah pawh chanvo hrang hrang a lo chelh tawh a,Kum 1989 ah tual Upa ah thlan a ni a,Kum 1990 ah Kohhran Upa ah thlan a ni a, hemi kum vek hian Aizawl Presbytery chuan Dawrpui Kohhran Biakin ah Dawrpui Vengthar Kohhran Upa atan a nemnghet a ni.1995 leh 1996 ah khan Kohhran Secrettary a ni a.Kum 1999 leh kum 2009 ah Puitling Sunday School superentendent a ni bawk.Tin,Dawrpui Vengthar Pastor Bial ah Auditor,Treasurer(Bial Khawmpui Sum vawngtu) Secretary leh Chairman te a lo ni tawh bawk a ni.

Pathian Kohhran ho zingah Vawin thlenga Rawngbawlna a thawk ve hi a tlin leh fel vang nilovin Khawngaihna a vang chauh a ni tih hi,Thu leh Hla a a puanchhuah fo chu a ni.Amah hi mite anga thu leh hlathiam nilo mahse a phak ang tawk tawk a music tuipui ve em em a ni a,Hla pawh 53 lai a lo phuah ve tawh a ni.A hla te hi Thinlunga Pathian thuchah a dawnte Hla thu in a dah chhuak mai thin a,A thlukte pawh amah in a thiam ang tawk tawk a a siam te a ni hlawm.

Kristian pun chak chhan pawimawh tak chu Kristian Literature pawl hrang hrang te tan lak vang a ni. Thawm awm lovin khawvelah hian Literature hian Indona hi a kalpui muah muah reng a. Communist tluk chhiat chhan pawh Literature vang hi a ni tih theih a ni.

Tunlai khawvel changkangah phei hi chuan tawngkaa Chanchin tha hril hi a har em em tawh a. Chuvangin, Literature hi rawngbawlna pawimawh tak a ni lehzual ta a ni. Kan Zosapte khan literature lama tan lak a tulzia an hre chiang a, an bei nghal chat a. Bible lehlin, Zirlai bu siam, hla, drama etc. Literature hmangin Zoram hi Kristianah an siam ti ta ila a sual tam awm love.

Literature hi Missionary huaisen, tlanchhe ve ngai lo, tawng tinreng thiam bawk si a ni. Dam loh leh chak loh chang nei lo, kal hrehna hmun a nei lova, thu nung leh thil ti thei, do tute hneh zel thin a ni. Literature hi thalaite nunkawng hruaitu, ringtu chak lote chelh dingtu, rawngbawltute fuihtu a ni a, a pawimawhna hai der theih a ni lo. Kan hman tangkai zawh poh leh kan rawngbawlna zarzotute an thahnem dawn a ni.

KTP Beat Contest inbuatsaihna

Landagi,Abawih-i,tete-i

Anni hi KTP Beat Contest a hmeichhe hlang band awmchhun an ni dawn a, an fakawm em a, an thlalak hi dah loh chi pawh a ni lo....

UPA V.THANGZAMA NITE

July ni 20 zan dar 7 khan Dawrpui Vengthar KTP ten kan Kohhran Upa, Upa V.Thangzama pualin hun kan hmang a. He hunah hian kohhran mipui leh vengpawn lam atangin he hun minlo hmanpui leh hlutpuitu mi thahnem tak an tel a ni.

(click to enlarge)

He hunah hian Upa V.Thangzama hla phuah leh lehlin te, a chanchin ngaihthlakna hun leh chawimawina Thuziak hlan te leh Upa V.Thangzama hla te sa in hun hman a ni a. A hlaphuah 6 (paruk) leh a lehlin 1 (pakhat) Zaithiam ten sa in Live Music hmanga rem a ni. A hla sa tu te :-

1) Solo : Nl Baby Malsawmtluangi-Ka Zaichhan Isua
2) Solo : Nl Lalhmangaihi(sini) -Siamtu zai ngai mai rawh
3) Solo : Tv Lalfakawma (Faktea)-Naktuk thu ka hrelo
4) Duet : Nl Zohmangaihi(tete-i)&Tv C.Lalmuankima-Khawngaih chhandam
5) Trio : Nl.Lalhmangaihi(Sini)Tv. Lalfakawma (Fakte-a) Tv Lalmuanpuia Hnamte (Buddy)-Engkim thawthei zai se
6) Kohhran Zaipawl : Zanriah hnuhnung

Faktea, Tete-i & mka, Sini

Baby, Tete-i&mka, Faktea-Sini-Buddy(Trio)

Heng bakahte hian Kristian Hlabua a hla lehlin leh a phuahte hmangin mipui zaihona kan nei bawk a ni.

V. THANGZAMA CHANCHIN

Pian leh Murna : Zanina a puala hun kan hman tak Vanchhawng Thangzama, Upa V. Thangzama tia hriat lar hi kum 1935, March ni 23 khan Ngopa, Lalzidinga Sailo Lal khuaah a lo piang a. Ngopa khua hi a hmaa Khawdungseia awm leh a kiang Chhiahpui khua lo ni tawh Sailo Lal Hrangchhuana khaw mite vek an ni. Ngopa lal hi chu a fapa Lalzidinga a ni a, lalte zinga matric pass hmasa ber a ni. Shillong-a zir chhuak leh Assam milian hmelhriat pha a niin sawrkar duhsakin Middle School pawh a hawng nghe nghe a ni. Upa V. Thangzama pa hi Upa Vanchhawng Thuama (L) a niin a nu chu Laichhungi(L) a ni. An unau hi sawm niin mipa 4 leh hmeichhia 6 an ni. Kum 1960-ah Pi Vanlalengi d/o Rangkunga, Dawrpui Veng nen inneiin fa panga-mipa 4 leh hmeichhia 1 an nei a. Kum 1972 khan kan veng, Dawrpui Vengtharah hian rawn pem lutin, tunah hian a fa leh tute nen Compound khatah an khawsa mek a, kan vengah hian a nu leh pa pawh vuiliam an ni lo tawh nghe nghe a.

Zirna/Thiamna Lam : Primary School hi Ngopaah a kal a, a thiam thei pawl niin pakhatna a ni thin. Middle School pawh Ngopaah tho a kal a, High School erawh Mizo High School, Mc Donald Hill, Aizawlah a kal thung a. Hemi hnu hian I.Com. (Intermediate of Commerce, tuna 10+2 kan tih hi) Imphal-a college hawn thar, D.M. College-ah a kal a. B.Com erawh City College, Calcutta-ah zirin kum 1958 khan a zir chhuak a.

Hnathawh (Sawrkar Hna) Lam : Kum 1959, October ni 20-ah Govt. Higher Secondary School, Aizawlah Commerce zirtirtuin a thawk tan a, he hna hi 1961 thleng a thawk a. Hemi hnu kum 1962 khan Assam Civil Service-ah a lut a. BDO-in Mamit, Saitual leh Nowgong & Garo Hills-ah te a thawk a. Sub-Divisional Planning Officer, Tura District (Assam) a ni tawh bawk a. Hemi hnu, Mizoram U.T. a lo nih khan Assam Civil Service atangin Mizoram Civil Service-ah inletin Under Secretary leh Deputy Secretary-in department hrang hrang kum eng emaw zah a enkawl a. Extra Additonal Commissioner leh Addl. District Commissioner hnate a chelh tawh a. Tin, Lunglei D.C. pawh a lo ni tawh a. Department hrang hrang (LAD, Sericulture, Administrative Training Institute leh Relief & Rebabilitation)-ah te Director-in a awm tawh bawk. Mizoram Publice Service Commission din a nih khan Secretary hmasa ber a ni bawk. Hmun hrang hrang - Mizoram chhung leh pawna sawrkar hna a thawh hnuin kum 1994, January ni 1 khan a pension ta a ni. A pension hian sawkara kaisawina tawp (Super Time Scale) a thleng hman a ni.

Khawtlanga Rawngbawlna : Lehkha a zir laiin zirlai pawl hrang hrangah hruaitu a ni tawh a. CYMA lamah pawh Tum hnih lai Vice President a lo ni tawh a, Lunglei Sub-Headquarters YMA-ah President a ni tawh bawk. Hmun hrang hranga sawrkar hnathawka a awmna apiangah theihtawpa khawtlang tana thawk mi a ni. Tin, kan veng YMA-ah te pawh O/B hna a lo chelh nual tawh a. Heng bakah hian zirnain a kaihhnawih hrang hrang board/organisation-ah member a ni tawh a.

Rawngbawlna Lam : A pianna khua Ngopa atangin lehkha zir leh hnathawka a awmna khaw hrang hrangah kohhran rawngbawlna lam a ngaipawimawh thei hle a, a bikin zaipawl rawngbawlna lamah a thawh hlawk hle. January ni 29, 1978 khan Upa atan thlantlin a niin October ni 8, 1979 khan Chhimthlang Presbytery Inkhawmpui West Phaileng Kohhran Biak Ina neihah Moderator Upa Lalrammawia’n Dawrpui Vengthar Kohhran Upa (Sawmna) atan a nemnghet a. Lungleia sawrkar hna thawka a awm, kum 1984-85 bawrah Baptist Kohhran lam Assembly Lunglawn a nghah chuan kohhran ramri an thiat thut mai a, hetih hun laia Presbyterian ‘Upa Ordained’ awmchhun a nih avangin Presbyterian Kohhran ding tir leh Bial siam thara Chairman hmasa ber atan ruat a ni a. Zoram pawna hna a thawh laiin Zoram Pawn Mizo Kohhran Upa a ni tawh bawk.

Kohhrana chanvo pawimawh a chelh hrang hrangte :- 1) Tualchhung Kohhran : Tualchhung kohhrana chanvo a chelh hrang hrangte chu sawi vek sen a ni lova,kan kohhran upa min ber a ni tih chu kan hre tlang awm e. 2) Bial Level : i) Chairman hna tum khat a chelh tawh. ii) Nomination Committee Member. iii) Standing Committee Member tum thum. 3) Presbytery Level : Standing Committee tum hnih. 4) Synod Level : i) Music Committee Member tum thum. ii) Social Front Committee Member kum hnih. iii) Kristian Hla Bu Ennawn Sub-Committee kum thum.

Hla Lama A Sulhnu : Thu leh hlaa mirila sawi a ni naa tawngkam erawh a thiam vak bik lo, thu leh hlaa a thiamna chu hla thu hmangin a puang mai thin. Sawi aia ziak leh phuah lama talent nei tha a ni. Hla phuah mai bakah a thluk siam, lehlin leh Intihsiaknaa endik lamah a thawh hlawk hle a. A hla phuahte hi Zoram dung chhuak khawpa lar pawh a awm nual a. A hla phuah leh a phuah dan chu kan sawi vek seng lo a. Hla hi Pathian Hla - 30 vel a phuah tawh a; Ramngaih Hla - 5 vel leh English - in 3 a phuah tawh bawk. Heng bakah hian a sulhnu - A thluk siam, lehlin a nei nual bawk a, a hla phuah thenkhat hi Kristian Hla Bua seng luh leh puipun nia sak chite a ni hlawm. Zoram huapa Thu leh Hlaa a larna hi zanin hian kan lawma kan chawi sang a ni lo, hetianga Zoram-in mirila a neih zinga kan Kohhran Upa a tel pha hi kan chhuanga, zanin hian a pualin kan theih ang tawkin hun kan buatsaihsak mai zawk a ni. Zanin hian a hla phuahte hi kan theih ang/thiam ang tawkin kan sa a, a hla thute hi hla thu ngun lo a nih laiin Hla Thu ‘Poetic Word’ a hmang thiam hle a,ing euh deuha a rem laiin hriatthiam a awl hle a ni.

Awihawm lem loh ve!!!!!!!

KOHHRAN COMMITTEE ROOM THAR

Dawrpui Vengthar Presbyterian Kohhran committee Room thar chu Dt 17.6.09 (Nilai zan inkhom ban) khan hawnna inkhawm neiin Upa Lalkhawhluna'n kaihhruai in,Rev C.Chawngliana(Bialtu Pastor) in a hawng a ni. Hawnna inkhawm zawh hian thlalak ho na leh thingpui ruai kil in hun hman a ni a,Kohhran ho te kan hlim hle.

Biakin kawmchhak a Kohhran committee room thar hawn tak hi kum 2003-04 chho a rel tan niin,Heng hunlai hian Vengthlang lam(Dawrpui vengthar west kohhran) biakin tur kan buaipui chho mek bawk a ni a.Kan tha leh zung chu khuti lamah a kal deuh vek a ni ber e.

Committee Room sak chhunzawm kan han tharthawh leh chu Kum 2006 August thla a ni a,Hma lak chhoh ve zel a ni.Hetih rual hian 'Master Plan' neih a thra a hriatna a lo awm leh a,chumi hna hmasa a tan chuan contouring chu Dt.15.7.07 khan tih a ni a,Contour Map pawh kan Mithiam te a zarah kan nei ani.Kohhran Golden Jubilee a lo ni leh a,Ngaihtuahna thar nen Architech hovin 2008 August thla bawk khan khawl changkang tak tak hmangin kan Biakin leh a chhehvel,a hnuai lam thleng in contouring hi tih leh vek a ni.

He committee Room hi Kohhran committee chuan Tun kum a kan thleng tak Aizawl West Presbytery KTP Meet a peih hman kha a duh na in chu chu kan hman ta lo a ni.Hun in min daihlo a ni ber mai e.He committee Room sak chhoh a nih a tanga thil kal velah Kohhran Committee a in hawng hle a.A chhinchhiah tlak hle a ni.Thuneihna sang tak Building Committee ah pe in,chu chuan thil bawhzui tur a neih chu lo bawhzui turin sub committee a din veleh a,chutiang chuan tun hi kan thleng ta a ni.

Thil tha leh changkang duhna a lian ve zel a.Kohhran hausa te tih ang pui pui chu ti vek lo mah ila,Kan phak tawkah chuan a tha ber kan bitum chho ve ngat ngat zel niin kan inhria.

A senso lam hi sawi fak theih a nilo.Hun rei tak thil kalchho a ni a,Mahse Kohhran tresurer hnen atanga a tlangpui kan hriattheih dan in Rs.17,67,095 a ni e .

Hmabak a la tam hle mai.Mahse Pathian chakna leh Hausakna ringa kal te tan erawh chuan huphurh awm lam chu a ni hauh lo thung.Kawng hrang hrang a hma kan laknaah Pathian in a Kohhran ho te lungrualna min pe se,min awmpuiin min kaihruai zel rawh se.
(click 2 enlarge)